Toshkent shahri Mirzo Ulug‘bek tumani Alisherobod mahallasi hududidagi 25,52 gektar yer uchastkasi uchun auksion yakunlandi. Obyekt savdoga Mirzo Ulug‘bek tumani hokimi Boxodir Gaibnazarovning 17-dekabrdagi qarori asosida qo‘yilgandi.
Savdo 10 daqiqa 32 soniya davom etdi. Unda ikki talabgor ishtirok etdi, biroq Valid Trading xususiy korxonasigina 522,7 milliard so‘mlik yagona taklifni kiritdi. Shu tariqa yerning bir sotixi o‘rtacha 209 million so‘mga (16,15 ming dollar) baholandi.
Yer ko‘p qavatli turar joy binolari, ofislar, 4−5−6 qavatli mehmonxonalar qurish uchun sotildi.
Uchastka 49 yilga ijaraga berilmoqda. U qurilishi davom etayotgan “Toshkent-Sharqiy” aeroporti ro‘parasida, “Yangi O‘zbekiston” bog‘i va olimpiya shaharchasidan uncha uzoq bo‘lmagan joyda joylashgan.
Xaridor 15 kun ichida to‘lovni to‘liq amalga oshirish orqali 20% chegirmaga ega bo‘lishi yoki kamida 35% dastlabki to‘lov bilan uch yil davomida bo‘lib to‘lashi mumkin.
Lot hujjatlarida yer uchastkasi hududidagi daraxtlar, butalar va boshqa o‘simliklarni noqonuniy kesish, ildizi bilan sug‘orish, shikastlash, yo‘q qilish yoki qayta ekish taqiqlangani ko‘rsatilgan.
Tadbirkorlik subyektlari yagona davlat reyestriga ko‘ra, Valid Trading 2019-yil fevralida ro‘yxatga olingan, ixtisoslashmagan ulgurji savdo bilan shug‘ullanadi. Rahbari va asoschisi Voris Boriy o‘g‘li Abduvaliyev. Ustav kapitali 1,04 mlrd so‘m.
Abduvaliyev oziq-ovqat va ichimliklar (Ferrero, Mondelez, Splat, Korona, Soyyigit, Halitlar, Aerostar) ulgurji savdosi bilan shug‘ullanuvchi Toshkentdagi Gatter Group rahbari hisoblanadi. Ustav kapitali 29,3 mlrd so‘m bo‘lgan kompaniya egalari Ravshan G‘ayratovich Djamilov va Fatxulla Xayrullayevich Sadikov (har biri 50 foizdan ulushga ega).
Fatxulla Sadikov, shuningdek, Mars, Wrigley, Danone va boshqa kompaniyalar mahsulotlarini tarqatuvchi Adler Group Distribution (47,5 foiz, bunga Voris Abduvaliyev ham kirgan), yuk tashishga ixtisoslashgan Planet Service Plus (47,5 foiz), Havas Food supermarketlar tarmog‘i (70,1%) kabi 20 ga yaqin kompaniyaning aksiyalariga ega.
2023-yil iyunida Sadikov kompaniyasi Toshkentdagi sobiq “Algoritm” zavodini 307,6 milliard so‘mga sotib olgandi.
