O‘zbekiston Harbiy sudi Prezident administratsiyasi departamenti sobiq rahbari Komil Allamjonovga suiqasd uyushtirish bo‘yicha ochilgan jinoyat ishini ko‘rib chiqishni boshladi. Bu haqda inson huquqlari bo‘yicha “Ezgulik” jamiyati rahbari Abdurahmon Tashanov ma’lum qildi.
Uning so‘zlariga ko‘ra, jarayon yopiq eshiklar ortida kechmoqda. “Mahkama mutlaqo maxfiy: sudlanuvchilar soni ko‘pligi, qo‘yilayotgan ayblov jiddiyligi va uning jamoatchilik uchun muhimligiga qaramay yana mavhumlik hukm surmoqda”, — deb yozadi u.
Harbiy sud bu xabarlarga izoh bermadi. “Gazeta.uz” bu borada Oliy sud va Bosh prokuraturaga so‘rovlar yubordi.
Komil Allamjonov ishi
26-oktabrga o‘tar kechasi Qibray tumanida temir yo‘l kesishmasi yaqinida ikki noma’lum shaxs Komil Allamjonov o‘tirgan Range Rover rusumli avtomobilga bir necha marta o‘q uzgan va voqea joyidan qochib ketgan. Haydovchi va sobiq amaldor jarohat olmagan.
Holat yuzasidan Jinoyat kodeksining 25, 97 (Qasddan odam o‘ldirishga suiqasd qilish) hamda 248 (O‘qotar qurolning, o‘q-dorilarning, o‘qotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) moddalari bilan jinoyat ishi qo‘zg‘atilgan.
27-oktabr kuni ertalab Bosh prokuratura bir gumonlanuvchi hibsga olingani haqida xabar bergan edi. Bir kun o‘tib yana uch nafar shaxs ushlangani ma’lum qilingan.
Bosh prokuraturaning 25-noyabrdagi xabarida suiqasdda gumonlanayotganlar soni 7 kishiga yetgani, ulardan 2 nafariga qidiruv e’lon qilingani aytilgan. Xususan, ulardan biri Javlon Yunusov Janubiy Koreyada qo‘lga olinib, O‘zbekistonga ekstraditsiya qilingan. Yana birining Qozog‘istonda yashiringan manzili aniqlangan.
Qotillikka suiqasd ishi bo‘yicha yana ikki nafar Rossiya fuqarosi — Bislan Rasayev va Shamil Temirxanovga Interpol orqali qidiruv e’lon qilingan. Ular qonunga xilof ravishda O‘zbekistonga kirish va chiqish, jinoyat haqida xabar bermaslik hamda o‘qotar qurolning qonunga xilof muomalasida ayblanmoqda.
Checheniston rahbari Ramzan Qodirov 26-dekabrdagi postida prezident administratsiyasi Axborot siyosati departamenti sobiq rahbari Komil Allamjonovga suiqasd qilishda “chechen izi” (bu haqda OAV xabar bergan edi) borligini va bu ishga aloqadorligini ikkinchi bor rad etgandi: “Buni suiqasd deb atash qiyin”, deb yozdi u va takrorladi: “Agar buni men tayyorlaganimda edi, ishni oxiriga yetkazgan bo‘lardim… Men haqimda bunday yomon fikrda bo‘lmang”.
U, shuningdek, Komil Allamjonov va Istiqbolli loyihalar milliy agentligi direktori Dmitriy Liga tahdid qilgan. Deputat Odiljon Tojiyev Checheniston rahbarining tahdidlarini qoralagan.
Komil Allamjonov yaqin vaqtgacha Prezident administratsiyasi Axborot siyosati departamenti rahbari, bungacha Prezident administratsiyasi rahbari o‘rinbosari, Axborot va ommaviy kommunikatsiyalar agentligi direktori, prezident matbuot kotibi lavozimlarida ishlab kelgan.
