Prezident topshirig‘iga ko‘ra, 2025-yilda Toshkent shahri uchun qo‘shimcha 1000 ta avtobus xarid qilish rejalashtirilmoqda. Bu haqda 11-yanvar kuni “O‘zbekiston 24” telekanaliga bergan intervyusida transport vaziri Ilhom Mahkamov ma’lum qildi.
2023-yil oktabr oyida Toshkent hokimligi Xitoyning BYD kompaniyasi bilan 2000 ta K9UD eBus elektrobus xarid qilish bo‘yicha shartnoma imzolagan edi. BYD shuningdek, poytaxtda elektrobus yig‘ishni boshlashni rejalashtirgan.
Bundan tashqari, vazirning so‘zlariga ko‘ra, yil oxirigacha avtobus bekatlarida QR-kodli bir martalik qog‘oz chiptalarni xarid qilish uchun 675 dona infokiosk o‘rnatiladi. Ular 1-yanvar kuni sayohat qilish uchun salonda naqd pul qabul qilish bekor qilinganidan keyin paydo bo‘lgandi.
Endi yo‘lovchilar sayohat uchun transport kartalari va ATTO ilovasi, kontaktsiz bank kartalari, to‘lov ilovalari va QR-chiptalari yordamida to‘lashi mumkin.
“Umuman olganda, 1-fevralga qadar Toshkent shahrida jamoat transportini rivojlantirish bo‘yicha qaror loyihasi ishlab chiqiladi, shuningdek, yangi dastur qabul qilinishi ko‘zda tutilgan, — dedi Ilhom Maxkamov.
Transport vazirligi ma’lumotlariga ko‘ra, bugungi kunda infokiosklarning umumiy soni 5100 tani tashkil etadi, shundan 769 tasi avtobus bekatlarida o‘rnatilgan.
Avtobuslarda naqd pul qabul qilish bekor qilinganidan keyin 1-yanvardan 10-yanvargacha (2024-yil 1−10-yanvarga nisbatan) avtobuslarda kunlik qayd etilgan yo‘lovchilar oqimi 43,5 foizga — 871 ming kishidan 1,19 million kishiga (2024 va 2025-yillar 10-yanvarlari) oshgan, daromad esa 36 foizga o‘sgan — 8,5 dan 11,5 milliard so‘mga.
2024-yil oxirida Toshkent shahridagi avtobus parki 1901 taga ko‘paydi, bu 2022-yilga (1485 ta) nisbatan 28 foizga ko‘p. Bundan tashqari, ta’kidlanishicha, so‘nggi ikki yil ichida bekatlarda kutish vaqti ikki barobar qisqargan — 22 daqiqadan 10−12 daqiqagacha.
