O‘zbekiston Kompartiyasi Markaziy Qo‘mitasining sobiq mafkuraviy kotibi Ra’no Abdullayeva 12-yanvar kuni 89 yoshida vafot etdi. Bu haqdagi ma’lumotni “Gazeta.uz”ga manbalar tasdiqladi.
U 1935-yil 16-sentabrda Buxoro viloyatining Shofirkon tumanida tug‘ilgan. 1970−1987-yillarda Abdullayeva O‘zbekiston SSRda eng nufuzli shaxslardan biri hisoblangan.
Uchuvchi-kosmonavt, Sovet Ittifoqi qahramoni Valentina Nikolayeva-Tereshkova Kirov nomli kolxoz mudiri Tarsuna Axunova va O‘zbekiston Komsomol Markaziy Komitetining birinchi kotibi Ra’no Abdullayeva (o‘ngda) bilan suhbatlashmoqda. Manba.
1963−1971-yillarda O‘zbekiston komsomolining birinchi kotibi, so‘ngra O‘zbekiston SSR Ministrlar Soveti raisining o‘rinbosari, 1987-yilgacha O‘zbekiston Kompartiyasi Markaziy Komitetining mafkura bo‘yicha kotibi lavozimlarida ishlagan.
U O‘zAga bergan 2019-yildagi intervyusida O‘zbekiston SSR Kommunistik partiyasi Markaziy qo‘mitasining birinchi kotibi Sharof Rashidov, “paxta ishi,” mafkuraning o‘rni haqida gapirib bergan edi.
“Har kuni yuz minglab odamlar metrodan foydalanadi. Metro qurilishiga erishish uchun Sharof Rashidovich bir necha bor Brejnev huzuriga bordi, tez-tez Ministrlar Sovetiga tashrif buyurdi. U Muruntovda oltin konini ochishga muvaffaq bo‘ldi, bu loyihani amalga oshirish uchun 10 yil kerak bo‘ldi”, — dedi u.
Abdullayeva, shuningdek, SSSR davrida o‘zbek kadrlari taqdiri haqidagi qarorlar ko‘pincha mahalliy voqelikni hisobga olmagan holda Moskvada qabul qilinganini, bu esa ba’zan nohaq ayblovlar va qatag‘onlarga olib kelganini ta’kidlagan.
U Atom energiyasi agentligi (“O‘zatom”) ning hozirgi rahbari Azim Axmedxadjayevning ham buvisi bo‘lgan.
