Kotrina Kulbite futbol bo‘yicha O‘zbekiston ayollar milliy terma jamoasining bosh murabbiyi etib tayinlandi, deya xabar bermoqda O‘zbekiston futbol assotsiatsiyasi.
17-yanvar kuni O‘FA rahbariyati Kotrina Kulbite bilan uchrashdi. U ulkan tarix va katta potensialga ega jamoa bosh murabbiyi etib tayinlanganidan mamnun ekani va ayollar futboli yanada rivojlanishida bor kuch-g‘ayratini ishga solishga tayyorligini bildirdi.
Shundan so‘ng, UEFA`ning “Pro” litsenziyasiga ega bo‘lgan Kotrina Kulbite bilan shartnoma masalasida dastlabki muzokaralar olib borildi. Litvalik mutaxassisning vazifalari muhokama qilindi va kelgusidagi rejalar xususida fikr almashildi.
O‘zbekiston 2029-yilda ayollar futboli bo‘yicha qit’aning eng nufuzli turniri — ayollar Osiyo kubogiga mezbonlik qiladi. O‘FA rahbariyati mazkur kubokda munosib ishtirok etish, Jahon chempionati va Olimpiya o‘yinlariga yo‘llanma olish asosiy maqsadlar ekanini aytdi.
Shu bilan birga, 2025-yilning iyun oyida o‘tkaziladigan 2026-yilgi ayollar Osiyo kubogi saralash bosqichida yuqori natija ko‘rsatib, qit’a turniriga yo‘llanma olish zarurligini ta’kidlandi.
Ma’lumot o‘rnida, Kotrina Kulbite UEFA murabbiylarni o‘qitish bo‘yicha instruktori hisoblanadi. U Litva ayollar terma jamoasi va turli yosh toifalaridagi qizlar terma jamoalarida bosh murabbiy va yordamchi murabbiy lavozimlarida faoliyat yuritgan.
