“Alohida dori vositalarini klinik tadqiqotlarsiz davlat ro‘yxatidan o‘tkazish tartibi to‘g‘risida”gi nizom 17-yanvar kuni Adliya vazirligida davlat ro‘yxatidan o‘tkazildi.
Nizomga ko‘ra, dori vositalarining klinik tadqiqotlarsiz davlat ro‘yxatidan o‘tkazish to‘g‘risidagi qaror “Farmatsevtika mahsulotlari xavfsizligi markazi” davlat muassasasining Farmakologiya qo‘mitasi tavsiyasiga muvofiq Sog‘liqni saqlash vazirligi tomonidan tashkil etilgan doimiy faoliyat olib boruvchi ekspertlar kengashi tomonidan qabul qilinadi.
Dori vositalarini klinik tadqiqotlarsiz davlat ro‘yxatidan o‘tkazish hamda ro‘yxatdan o‘tkazilganlik guvohnomasini berish hukumat qarorida belgilangan tartibga muvofiq amalga oshiriladi.
Quyidagi dori vositalari klinik tadqiqotlarsiz davlat ro‘yxatidan o‘tkaziladi, jumladan:
- “Zarur ishlab chiqarish amaliyoti — GMP” talablariga muvofiqligi bo‘yicha o‘rganishlar o‘tkazish talab etilmaydigan dori vositalari ro‘yxatiga kiritilgan dori vositalari;
- mahalliy ishlab chiqaruvchilar tomonidan davlat ro‘yxatidan o‘tkazish uchun taqdim etilgan xavfsizligi va samaradorligi referens preparatdan qolishmasligi klinik oldi tadqiqotlarida isbotlangan jenerik dori vositalari va galen preparatlari;
- bir ishlab chiqaruvchi tomonidan turli savdo nomlari ostida ishlab chiqilgan, tarkibi bir xil bo‘lgan dori vositalari.
Hujjatga ko‘ra, ariza beruvchi ekspertlar kengashi qarorlari hamda uning uning a’zolarining harakatlari (harakatsizligi) yuzasidan Sog‘liqni saqlash vazirligiga yoki bevosita sudga shikoyat qilishga haqli hisoblanadi.
Ariza beruvchi tomonidan taqdim etilgan shikoyat vazirlik tomonidan mazkur shikoyat kelib tushgan kundan e’tiboran o‘n besh kun ichida, qo‘shimcha o‘rganish va (yoki) tekshirish, qo‘shimcha hujjatlarni so‘rab olish talab etilganda esa, bir oygacha bo‘lgan muddatda ko‘rib chiqiladi.
Shikoyat bilan murojaat qilgan ariza beruvchi shikoyatni ko‘rib chiqishda ishtirok etish huquqiga ega. Bunda ariza beruvchi shikoyat ko‘rib chiqilishidan ikki kun oldin uni ko‘rib chiqish vaqti va joyi haqida ogohlantiriladi.
SSV shikoyatni ko‘rib chiqish natijasi bo‘yicha quyidagi qarorlardan birini qabul qilishga haqli:
- e’tiroz asossiz bo‘lsa, shikoyatni qanoatlantirishni rad etish;
- e’tiroz asosli bo‘lsa, ekspertlar kengashiga qabul qilingan qarorni qayta ko‘rib chiqish yoki uning a’zolari zimmasiga berilgan shikoyat mohiyati bo‘yicha muayyan harakatlarni amalga oshirish majburiyatini yuklash.
Sog‘liqni saqlash vazirligi shikoyat bilan murojaat qilgan ariza beruvchiga o‘z qarorini u qabul qilingan kunning o‘zida ma’lum qilishi kerak. Mazkur nizom talablarining buzilishida aybdor bo‘lgan shaxslar qonunchilik hujjatlariga muvofiq javobgar bo‘ladi, deya yakunlanadi hujjat.
