Toshkent va Surxondaryo viloyatlarida qattiq va suyuq maishiy chiqindilarni yig‘ish va olib chiqish bo‘yicha yagona tariflar tasdiqlandi. Bu haqdagi qarorlar xalq deputatlari viloyatlar kengashlari tomonidan sanitariya-tozalash xizmatlari sifatini oshirish maqsadida qabul qilindi, deb xabar berdi Chiqindilarni boshqarish va sirkulyar iqtisodiyotni rivojlantirish agentligi.
Toshkent viloyatining aksariyat tuman va shaharlarida tarif QQS bilan bir kishiga 7840 so‘m miqdorida belgilandi (2023-yil noyabr oyidan 4400 so‘m, +1,8 baravar), yuridik shaxslar uchun esa QQS bilan bir metr kub uchun 82 880 so‘m (68 320 so‘m, +21,3%).
Tariflar Toshkent viloyatidagi Toza Hudud davlat unitar korxonasi hamda Angren Bunyod Fayz, Nurli yo‘l marvaridi, Ohangaron sanitariya tozalash, Rahnamo Servis va Zero-Waste kompaniyalariga tatbiq etiladi.
Ular quyidagi hududlarga xizmat ko‘rsatadi:
- Olmaliq, Angren, Ohangaron, Nurafshon, Chirchiq, Yangiyo‘l shaharlari;
- Ohangaron, Bo‘stonliq, Zangiota, Qibray, Quyichirchiq, O‘rtachirchiq, Yuqori Chirchiq, Parkent, Toshkent, Chinoz, Yangiyo‘l tumanlari.
Shuningdek, Surxondaryo viloyatining barcha shahar va tumanlari uchun yagona tariflar tasdiqlandi. Jismoniy shaxslar uchun narx bir kishi uchun 7000 so‘mni (QQS bilan 7840 so‘m), yuridik shaxslar uchun 122 219 so‘mni (QQS bilan 136 885 so‘m) tashkil etadi. O‘tgan yilning aprel oyida tariflar mos ravishda 4500 va 78 400 so‘m bo‘lgan, ya’ni o‘sish 74 foizni tashkil etgan.
Tariflar Toza Hudud DUK va Bio Texno Eko, Bio Tex Eco, Qiziriq invest, Sale kingdom va Sho‘rg‘un kommunal foydalanish kompaniyalariga tatbiq etiladi.
Agentlik ma’lumotlariga ko‘ra, yagona tariflar mamlakat rahbariyati qarorlari ijrosi doirasida belgilanadi. Ta’kidlanishicha, majburiy yagona tariflar ko‘rsatilayotgan sanitariya-tozalash xizmatlari sifatini oshirishga, shuningdek, yangi ish o‘rinlarini yaratishga qaratilgan.
2023-yilning noyabr oyida Toshkent, Farg‘ona, Andijon, Samarqand viloyatlari va Samarqand shahrida, o‘sha yilning dekabr oyida esa Buxoro va Namangan viloyatlarida chiqindilarni olib chiqish bo‘yicha yagona tariflar belgilangan edi.
O‘tgan yilning dekabr oyida O‘zbekiston Qonunchilik palatasi maishiy chiqindilarni olib chiqib ketish uchun qarzdorlik mavjud bo‘lganda elektr energiyasi uchun to‘lovni cheklash to‘g‘risidagi qonunni qabul qildi. Deputatlar tuzatishlarni faol muhokama qildi va natijada cheklovlar kiritilgunga qadar qarzni to‘lash uchun 5 kun vaqt berishga qaror qildi. Hujjat Senatga yuborilgan.
