Fevral oyida Toshkent supermarketlarida kartoshka 9-yanvarga nisbatan 26,1 foizga, sabzi 11,3 foizga, lavlagi 8,2 foizga, tuxum 7,8 foizga arzonlashdi, deya xabar berdi Makroiqtisodiy va hududiy tadqiqotlar instituti (MHTI) ekspertlari.
Kartoshkaning arzonlashishiga asosiy sabab uning importi bo‘ldi, bu yanvar oyidagi 23,9 foizlik o‘sishni qopladi. Mamlakat Afg‘oniston, Qirg‘iziston, Pokiston va Erondan 94,2 ming tonna kartoshka import qilgan.
Shu bilan birga, karam va bodring narxining oshishi qayd etildi. Karam yanvar oyida ham qimmatlashgan bo‘lsa (+6,9%), bodring yil boshida biroz pasaygandi (-1,7%). Shunga qaramay, 2024-yilning shu davriga nisbatan bodring narxi 30 foizga arzonligicha qolmoqda.
Fevral oyidagi boshqa o‘zgarishlar qatorida sut (-0,9%) va shakar (-0,4%) narxlarining biroz pasayishi ham qayd etildi. Bug‘doy uni, guruch, grechka, makaron, olma, banan va tovuq go‘shti narxi o‘zgarishsiz qoldi.
Yanvar oyida O‘zbekistonda inflyatsiya 0,72 foizni tashkil etdi, oziq-ovqat mahsulotlari 0,8 foizga qimmatlashgandi. O‘shanda asosiy o‘sish suyakli mol go‘shti (+1,1%), qo‘y go‘shti (+1,2%), kungaboqar yog‘i (+2,2%), paxta yog‘i (+1,9%) va sut (+0,3%) narxlarida kuzatilgan.
Shu bilan birga, yanvar oyida tuxum (-14,3%), guruch va guruch oqshog‘i (-1%), tovuq son go‘shti (-0,1%) va shakar (-0,7%) keskin arzonlashgan.
