12-fevral kuni Harbiy sud Komil Allamjonovga uyushtirilgan suiqasdga oid jinoyat ishi doirasida 10 nafar ayblanuvchiga hukm o‘qidi, deya xabar bermoqda Oliy sud matbuot kotibi Aziz Abidov.
E’lon qilingan sud hukmiga muvofiq, Shuhrat Rasulovga (2018 — 2020-yillarda Prezident davlat xavfsizlik xizmatining o‘z xavfsizligi boshqarmasini boshqargan) 23 yil, Javlon Yunusovga 18 yil 6 oy, Shoxrux Axmedovga 23 yil, Ismoil Jahongirovga 23 yil va Doniyor Tashxodjayevga (Toshkent shahar IIBB boshlig‘ining sobiq birinchi o‘rinbosari) 7 yil ozodlikdan mahrum qilish jazosi tayinlandi.
Qolgan 5 nafar sudlanuvchiga “qilmishiga muvofiq ravishda” turli muddatlarga ozodlikdan mahrum qilish jazolari berildi. Oliy sud xabarida ularning ismlari ochiqlanmagan.
Komil Allamjonov ishi
26-oktabrga o‘tar kechasi Qibray tumanida temir yo‘l kesishmasi yaqinida ikki noma’lum shaxs Komil Allamjonov o‘tirgan Range Rover rusumli avtomobilga bir necha marta o‘q uzgan va voqea joyidan qochib ketgan. Haydovchi va sobiq amaldor jarohat olmagan.
Holat yuzasidan Jinoyat kodeksining 25, 97 (Qasddan odam o‘ldirishga suiqasd qilish) hamda 248 (O‘qotar qurolning, o‘q-dorilarning, o‘qotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) moddalari bilan jinoyat ishi qo‘zg‘atilgan.
27-oktabr kuni ertalab Bosh prokuratura bir gumonlanuvchi hibsga olingani haqida xabar bergan edi. Bir kun o‘tib yana uch nafar shaxs ushlangani ma’lum qilingan.
Bosh prokuraturaning 25-noyabrdagi xabarida suiqasdda gumonlanayotganlar soni 7 kishiga yetgani, ulardan 2 nafariga qidiruv e’lon qilingani aytilgan. Xususan, ulardan biri Javlon Yunusov Janubiy Koreyada qo‘lga olinib, O‘zbekistonga ekstraditsiya qilingan. Yana birining Qozog‘istonda yashiringan manzili aniqlangan.
Qotillikka suiqasd ishi bo‘yicha yana ikki nafar Rossiya fuqarosi — Bislan Rasayev va Shamil Temirxanovga Interpol orqali qidiruv e’lon qilingan. Ular qonunga xilof ravishda O‘zbekistonga kirish va chiqish, jinoyat haqida xabar bermaslik hamda o‘qotar qurolning qonunga xilof muomalasida ayblanmoqda.
Checheniston rahbari Ramzan Qodirov 26-dekabrdagi postida prezident administratsiyasi Axborot siyosati departamenti sobiq rahbari Komil Allamjonovga suiqasd qilishda “chechen izi” (bu haqda OAV xabar bergan edi) borligini va bu ishga aloqadorligini ikkinchi bor rad etgandi: “Buni suiqasd deb atash qiyin”, deb yozdi u va takrorladi: “Agar buni men tayyorlaganimda edi, ishni oxiriga yetkazgan bo‘lardim… Men haqimda bunday yomon fikrda bo‘lmang”.
U, shuningdek, Komil Allamjonov va Istiqbolli loyihalar milliy agentligi direktori Dmitriy Liga tahdid qilgan. Deputat Odiljon Tojiyev Checheniston rahbarining tahdidlarini qoralagan.
11-yanvar kuni O‘zbekiston Harbiy sudi Allamjonovga suiqasd bo‘yicha jinoyat ishini ko‘rib chiqishni boshlagandi. Mahkama mutlaqo maxfiy boshlangan, deya yozgandi huquq himoyachisi Abdurahmon Tashanov.
Komil Allamjonov yaqin vaqtgacha Prezident administratsiyasi Axborot siyosati departamenti rahbari, bungacha Prezident administratsiyasi rahbari o‘rinbosari, Axborot va ommaviy kommunikatsiyalar agentligi direktori, prezident matbuot kotibi lavozimlarida ishlab kelgan.
