Samarqand viloyati Jomboy tumanida ichida yo‘lovchilari bo‘lgan avtobus yo‘l-transport hodisasiga uchradi, deya xabar bermoqda “Gazeta.uz”ga viloyat YHXB matbuot xizmati.
Qayd etilishicha, holat 11-fevral kuni 7:00 atrofida M-39 avtomobil yo‘lining 1079-kilometrida sodir bo‘lgan. Yo‘lovchi tashuvchi Zhongtong avtobusi harakatlanib kelayotib ko‘prik ustida YTHga uchragan Cobalt bilan to‘qnashgan.
Foto: Ijtimoiy tarmoqlar
Avtobus yengil mashinaning holatini inobatga olmasdan tezlikni me’yoridan oshirib kelgani oqibatida tormozni keskin bosgan. Ijtimoiy tarmoqlarda tarqalgan kadrlarda avtobus ag‘darilib ketganini ko‘rish mumkin.
Oqibatda bir nafar yo‘lovchi — 68 yoshli erkak tibbiyot birlashmasida vafot etgan. Jabrlanganlar bo‘yicha ma’lumot berilmagan.
Holat yuzasidan jinoyat ishi qo‘zg‘atilib, tergovoldi surishtiruv harakatlari olib borilmoqda, deyiladi xabarda.
