O‘zbekistonda yo‘l harakati qoidalarini buzgan haydovchilarga jarima balli tizimi joriy etilmoqda. Bu президент 20-fevral kuni imzolagan qonunda ko‘zda tutilgan.
O‘zgartirishlarga ko‘ra, qoidabuzarlik uchun asosiy jazodan tashqari, haydovchilarga jarima ballari ham beriladi. Bitta qoidabuzarlik uchun maksimal ball soni ikkitadan oshmasligi kerak.
Jarima ballari birinchi qoidabuzarlik sodir etilgan kundan boshlab bir yil davomida to‘planadi. Agar haydovchi bir yil ichida 12 dan ortiq ball to‘plasa, u avtomatik ravishda haydovchilik guvohnomasidan mahrum bo‘ladi. Cheklov muddati 6 oydan kam bo‘lishi mumkin emas.
Haydovchilik huquqini to‘xtatib turish muddati tugagandan so‘ng, uni faqat yo‘l harakati qoidalari imtihonini muvaffaqiyatli topshirgandan keyingina qayta olish mumkin bo‘ladi. Buni O‘zbekiston IIV YHXX “Gazeta.uz”ga tasdiqladi.
Shu tariqa huquqbuzarlar yana mashina boshqarishga ruxsat olishdan oldin o‘z malakasini isbotlashi kerak bo‘ladi.
Ushbu va boshqa o‘zgartirishlar Vazirlar mahkamasining bir oy muddatda ishlab chiqilishi va qabul qilinishi ko‘zda tutilgan qaroriga kiritilishi rejalashtirilgan. Unda jarima ballarini hisoblash tartibi va miqdori belgilanadi.
Yagona imtihon markazi
2022-yil 4-fevraldan Toshkent shahrining Sergeli tumanida Autodriver Study kompaniyasining haydovchilik guvohnomasini olish uchun imtihon topshirish Yagona imtihon markazi ish boshlagandi. Xuddi shu kundan boshlab poytaxt IIB YHXBning barcha ro‘yxatga olish va imtihon bo‘limlari nazariy va amaliy imtihonlarni qabul qilishni to‘xtatgan.
Markaz ochilganidan bir yarim oy o‘tib narxlarni 50 foizga oshirdi (nazariy va amaliy imtihon uchun jami 200 ming so‘mdan 300 ming so‘mgacha), buni valyuta kursi va boshqa mamlakatlardagi vaziyat bilan izohladi. Imtihon markazi asoschisi Komil Allamjonov shundan so‘ng haydovchilar uchun alternativa yo‘qligi bilan bog‘liq monopoliya ayblovlarini rad etgandi.
O‘shandan beri kompaniya Jizzax, Sirdaryo, Qashqadaryo, Namanagan, Andijon, Farg‘ona, Toshkent va Samarqand viloyatlarida ham imtihon markazlari ochdi.
Ayni paytda Toshkent imtihon markazida imtihon topshirish uchun birinchi urinish narxi nazariy imtihon uchun ham, amaliy imtihon uchun ham 1 million so‘mni tashkil etadi. Agar birinchisida muvaffaqiyatsizlikka uchralsa, keyingi urinishlar 1,2 million so‘mga tushadi. Shu tarzda uch yil ichida to‘lov narxi o‘n barobar oshdi.
Autodriver Study asoschisi Gid Systems Tashkent hisoblanadi. O‘z navbatida, ushbu kompaniya GID FZE (76%) va ITS Holding LLC’ga (24%) tegishli. Ilgari GID FZE korxonaning 100 foiziga egalik qilgan. Xuddi shu ta’sischilar GID License Plate kompaniyasiga ham xuddi shunday nisbatda egalik qiladi (avtoraqam ishlab chiqarishga aloqador, 2024-yilda u O‘zbekistonning top-20 soliq to‘lovchilari qatoriga kirgandi).
GID FZE, shuningdek, maktab darsliklarini nashr etish uchun mas’ul bo‘lgan Novda Edutainment nashriyotiga ham egalik qiladi.
