O‘zbekistonda uy-joylarni foydalanishga topshirish jarayoni soddalashtiriladi. Bu prezidentning 21-fevraldagi farmonida ko‘zda tutilgan.
Yanvar oyidagi yig‘ilishda ta’kidlanganidek, hozirda pudratchilar qurilishni boshlash uchun hujjatlarni kamida 5 bosqichda kelishib olishi kerak, bu esa ikki oygacha vaqt oladi.
Prezident qarori bilan 1-maydan boshlab qurilish ishlari boshlanishidan to foydalanishga ruxsatnoma berishgacha bo‘lgan barcha jarayonlar “Shaffof qurilish” tizimi orqali onlayn rejimga o‘tkaziladi.
Endi pudratchilar platforma orqali tayyor loyihani tashkilotlar bilan onlayn muvofiqlashtirishi mumkin bo‘ladi. Aniqlangan kamchiliklar jarayon davomida tuzatiladi.
Binoni foydalanishga topshirish uchun endi faqat Qurilish va uy-joy kommunal xo‘jaligi sohasida nazorat qilish inspeksiyasi xulosasi va Davlat yong‘in nazorati xizmatining xulosasi kerak bo‘ladi.
Bunda buyurtmachi tomonidan ishlab chiqilgan dastlabki loyiha hujjatlari shaharsozlik ekspertizasini o‘tkazishdan oldin sanitariya-epidemiologiya xizmati, ekologiya, nogironligi bor shaxslar jamoat birlashmalari vakillari bilan kelishiladi.
Qurilish-montaj ishlarining kelishilgan loyiha hujjatlariga muvofiq bajarilishi ustidan nazorat Qurilish inspeksiyasi tomonidan amalga oshiriladi.
Bundan tashqari, inspeksiyada ro‘yxatdan o‘tgan va uning nazorati ostida qurilgan ko‘p qavatli uylarni instrumental-texnik ko‘rikdan o‘tkazish amaliyoti bekor qilinmoqda.
Bunda seysmik qarshilik bo‘yicha instrumental-texnik tadqiqot xulosasi qurilish davrida turar joy binosini o‘rgangan laboratoriya tomonidan beriladi.
Toshkent shahrida 1-apreldan boshlab eksperimental tarzda ko‘p qavatli uylarni loyihalash va arxitektura-rejalashtirish topshiriqlarini ishlab chiqish uchun ruxsatnomalar berish jarayonlari birlashtiriladi. Bu muddatlarni ikki baravar qisqartirishi kutilmoqda.
To‘rt oy muddatda Qurilish va uy-joy kommunal xo‘jaligi vazirligi Davlat aktivlarini boshqarish agentligi bilan birgalikda raqamli platformani test rejimida ishga tushirishi kerak. Bu jarayonning barcha bosqichlarini — qurilish uchun yer uchastkalarini sotishdan tortib, binolardan foydalanish uchun ruxsatnomalar berishgacha bo‘lgan bosqichlarni qamrab oladi.
Farmon doirasida 1-martdan ko‘p qavatli uylarni rekonstruksiya qilish doirasida qurilishning yangi tartibi joriy etiladi. Loyihalarni amalga oshirish faqat barcha mulkdorlarning notarial tasdiqlangan roziligidan keyin mumkin bo‘ladi. Rezidentlarga uch turdagi kompensatsiya taklif etiladi. Renovatsiya tartibi to‘g‘risidagi hujjat 1-sentabrgacha ishlab chiqilishi rejalashtirilgan.
