Urush hududlariga ishga bormaslikka chaqirilgan Rossiyadagi o‘zbekistonliklar, guruch narxiga oid xabarlar, qizamiq kasalligiga chalinayotgan bemorlar, Fransiyaning “Lans” klubiga o‘tgan futbolchi Abduqodir Husanov, bloger Abduqodir Mo‘minov ishi bo‘yicha sud jarayoni va boshqalar — “Gazeta.uz”ning kun dayjestida.
Jinoyat kodeksining 5 ta moddasi bilan ayblanayotgan bloger Abduqodir Mo‘minov ishi bo‘yicha sud jarayoni boshlandi. 25-iyul kuni bo‘lib o‘tgan ilk ochiq sud majlisida OAV vakillari ishtirok etdi. Ishda 14 nafar jabrlanuvchi mavjudligi va ularga jami 903 mln so‘m moddiy zarar yetkazilgani aniqlangan.
May oyida Damas haydovchisi svetoforning qizil chirog‘iga o‘tib ketib, ikki o‘quvchi qizni urib yuborgan, ulardan biri 9 kundan keyin shifoxonada vafot etgan edi. Sud haydovchiga nisbatan 6 yil muddatga ozodlikdan mahrum etish hamda 2 yil transport boshqarish huquqini cheklash jazosini tayinladi.
Sanepidqo‘mita xorijdan kelgan qizamiq bilan og‘riganlar bilan aloqada bo‘lgan fuqarolarda qizamiq kasalligi aniqlanayotganini ma’lum qildi. 2023-yil boshidan buyon 306 kishidan qizamiq shubhasi bilan qon namunalari olinib, ulardan 164 nafarida kasallik qayd etilganini ma’lum qildi.
Model va dizayner Madina Maxmudova (Rixdinas) Toshkent metropoliteni vagonida kiyimlar namoyishini o‘tkazib, videosini tarmoqqa joyladi. Metropolitenda xavfsizlikni ta’minlash boshqarmasi video metropoliten bilan kelishilmay olingani uchun modellar bilan tushuntirish ishlari olib bordi.
Hukumat qarori bilan endi sport pasporti davlat xizmatlari markazlari yoki YAIDXP orqali vakolatli organ tomonidan beriladi. Cport pasportining amal qilish muddati — 5 yil.
O‘zbekistonda xizmat ko‘rsatgan madaniyat xodimi, yozuvchi Luqmon Bo‘rixon 58 yoshida vafot etdi.
Davlat ekologiya qo‘mitasining sobiq boshlig‘i, Ekopartiyaning sobiq rahbari, 2021-yilgi saylovda prezidentlikka nomzodi qo‘yilgan Narzullo Oblomurodov Toshkent moliya instituti prorektori etib tayinlandi. Oliygohga, shuningdek, Alimnazar Islamkulov ham prorektor bo‘ldi.
Jasur Salixov yangi tashkil etilgan Markaziy Osiyo atrof-muhit va iqlim o‘zgarishini o‘rganish universiteti (Green University)ga rektor etib tayinlandi. U bunga qadar Toshkentdagi Xalqaro Vestminster universiteti prorektori lavozimida faoliyat yuritgan.
Namangan shahrida Shimoliy Farg‘ona kanaliga tushib ketgan Damas mashinasini qutqarish paytida ichida 5 nafar bola bo‘lgan yana bir Damas kanalga tushib ketdi. Hozirda bolalarning ahvoli yaxshi, bir nafari shifoxonaga yotqizilgan.
Qonunchilik palatasi deputatlari qabul qilgan qonun loyihasiga ko‘ra, etil spirti, alkogol va tamaki mahsulotlarini qonunga xilof ravishda ishlab chiqarganlik to‘g‘ridan-to‘g‘ri jinoiy javobgarlikka sabab bo‘lishi mumkin.
Tarmoqlarda Toshkent shahri Sergeli tumanidagi “Quruvchilar” mahallasida bir sutkadan ortiq vaqtdan beri elektr energiyasi yo‘qligi xabari tarqaldi. Tuman hokimiyati bu bo‘yicha izoh berib, elektr ta’minoti 25-iyul soat 19:00 da tiklanishini ma’lum qildi.
Namanganda Katta Andijon kanali, Qoradaryo va Sirdaryo daryolarida cho‘kib ketgan 4 kishi — ikki nafar bola va ikki nafar erkak qidirilmoqda.
Toshkentda yengil avtomobil haydovchisi qoidalarni buzib, YTH holatini yuzaga keltirdi, shu sababli 28-yo‘nalishdagi elektrobus haydovchisi keskin tormoz bosishga majbur bo‘ldi. Oqibatda avtobus yo‘lovchilaridan biri yiqilib, shifoxonaga olib ketildi.
Qamchiq dovonida DAF yuk avtomashinasi yoqilg‘isining oqib ketishi sababli ortidagi CIMC transport vositasi toyib xandaqqa tushib ketdi. YTH oqibatlari yo‘lning bir tomoni vaqtincha yopilgan holda bartaraf etilgan, tan jarohati olganlar yo‘q.
USAID`ning 2019−2023-yillarga mo‘ljallangan “O‘zbekiston barkamollik uchun ta’lim dasturi” yakuniga yetdi. 29,5 mln dollarlik loyiha doirasida to‘rtta fandan darsliklar va o‘qituvchilar uchun qo‘llanmalar ishlab chiqildi. Darsliklar 4 yil davomida Sirdaryo va Namangan viloyatlarida tajribadan o‘tkazildi.
Sharofiddin Musayev har ko‘chatga yiliga atigi 17 litr suv sarflab, Kitobning qovjiragan adirlarida yong‘oqzorlar bunyod etadi. Qachonlardir bu joylar ko‘m-ko‘k o‘rmon edi, ammo aholi daraxtlarni o‘tin qilib yuborgan. Shunga qaramay, namliksiz ham daraxtlarni qaytarish mumkin. Sabina Bakayeva reportaji — shu haqda.
FVVga qarashli Toshkentdagi harbiy qismda samarqandlik askar vafot etdi. Marhumning pnevmoniya sababli olamdan o‘tgani aytilmoqda. Ammo yaqinlari bundan shubhalanib, unda jarohat izlari borligini aytmoqda. Harbiy prokuratura tergovga qadar tekshiruv harakatlari olib borilayotganini ma’lum qildi.
“Yangi Toshkent” bosh rejasini ishlab chiqish uchun jahon arxitektura byurolari — Singapurning Meinhardt, Britaniyaning Foster + Partners va Gollandiyaning OMA kompaniyalari jalb qilindi.
O‘zbekistonning Kiyevdagi elchixonasi Ukraina Qurolli kuchlari Bosh shtabining Donetsk viloyatida O‘zbekiston fuqarolari aniqlangani haqidagi ma’lumoti tasdiqlansa, fuqarolar manfaatlarini himoya qilish uchun barcha zarur choralar ko‘rilishini ma’lum qildi.
Qo‘shimcha imkoniyatlardan foydalanish uchun saytda ro‘yxatdan o‘ting