20 октябрь куни Халқаро футбол федерацияси (ФИФА) октябрь ойи учун миллий терма жамоаларнинг янгиланган рейтингини эълон қилди. Ўзбекистон ўз позициясини бир қаторга яхшилаб, 617 очко билан дунёнинг 209 жамоаси орасида 48-ўринни эгаллади.
Мазкур кўрсаткич билан Осиё футбол конфедерацияси аъзолари орасида Эрон (27-ўрин), Австралия (40-ўрин) ва Жанубий Корея (44-ўрин)дан кейинги тўртинчи поғонани банд этди.
Бундан аввалроқ Football Rankings сайти ФИФА рейтингининг тахминий башоратини қилган, унда Ўзбекистон 46-ўринни эгаллаб, ўз тарихидаги энг яхши натижа сари илдам қадам ташлашга имкон туғилган эди.
Жаҳон етакчилигини 1621 очко билан Аргентина мустаҳкам эгаллаб турибди. Унинг ортидан амалдаги жаҳон чемпиони Германия (1465) ва Бразилия (1410) бормоқда. Кучли ўнликдан Бельгия, Колумбия, Чили, Франция, Португалия, Уругвай ва Испания ҳам жой олган.
2018 йилги жаҳон чемпионати мезбони Россия эса 53-ўринни эгаллаган ҳолда антирекорд қайд этди.
