17−26 ноябрь кунлари Санкт-Петербургда (Россия) ёшлар ўртасида бокс бўйича V жаҳон чемпионати (AIBA Youth World Boxing Championships) бўлиб ўтди. Мусобақа доирасида 63 мамлакатдан 351 нафар спортчи иштирок этди, дея хабар қилинди Халқаро ҳаваскор боксчилар ассоциацияси сайтида.
Ўзбекистон терма жамоаси турнирда 10 нафар боксчи билан иштирок этиб, бир кумуш, уч бронза медалини қўлга киритиб, миллий термалар умумий рўйхатида (0−1−3) 11-ўринни банд этди. Кучли учликдан эса Куба (2−2−0), АҚШ (2−0−2) ва Қозоғистон (1−2−1) жой олди. Медаллар сони бўйича Ўзбекистон санаб ўтилган давлатлар қаторида мусобақанинг энг яхши терма жамоасига айланди.
Ўсмирлар ўртасида 2015 йилги жаҳон чемпионати бронза медали соҳиби Шунқор Абдурасулов 56 кг гача вазн тоифасида ярим финал баҳсида америкалик Марк Кастрога қарши жанг олиб борди. 18 ёшли ўзбекистонлик боксчи яхши жанг ўтказганига қарамасдан, шу куни рақиби ундан кучлилик қилди — 0:4.
Ўсмирлар ўртасида Осиё вице-чемпиони Отабек Холматов 52 кг гача вазн тоифасида рингга кўтарилиб, ярим финалга қадар етиб келди ва Япония вакили Хаято Цуцуми билан учрашди. Жангда ғолибликка жуда яқин қолганида япон боксчиси ғалаба қозонди — 3:2.
Ўсмирлар ўртасида Осиё чемпионати кумуш медали совриндори Шохруз Раҳимов (91 кг гача) россиялик Владимир Узунянга қарши жангга киришди. Мезбонлар вакили узун қўлларидан фойдаланган ҳолда яқин масофадаги жангдан қочиб, якунда ғалабага эришди — 0:5.
Ўсмирлар ўртасида амалдаги жаҳон ва Осиё чемпиони Билолбек Мирзараҳимов (60 кг гача) ярим финалда туркиялик Нежат Экинжини мағлубиятга учратиб, «олтин» учун америкалик Жонсон Деланте билан учрашди. Мирзараҳимов тажовузкор, тезкор жанг кўрсатиб, кўпроқ зарба берган бўлса ҳам, кутилмаганда ғолиблик Деланте ҳисобига ёзилди — 4:1.
