Европа иттифоқи Афғонистон президенти Ашраф Ғанининг тинчлик келишуви бўйича таклифини қўллаб-қувватлаб, тинчлик ўрнатиш жараёнига хайрихоҳ «Толибон» ҳаракати аъзоларини санкцион рўйхатдан чиқаришга тайёр.
Бу ҳақда Европа Иттифоқининг ташқи ишлар ва хавфсизлик сиёсати бўйича Олий вакили, Европа комиссияси вице-президенти Федерика Могерини 27 март куни Тошкентдаги Афғонистон бўйича «Тинчлик жараёни, хавфсизлик соҳасида ҳамкорлик ва минтақавий шериклик» мавзусида ўтказилган халқаро конференцияда маълум қилди.
«Дипломатик томондан биз сакнция эълон қилинганларни рўйхатдан чиқаришга ёрдам кўрсатишимиз мумкин. Би шунингдек қуроллик қаршиликни тўхтатган одамлар билан жамиятда ўз ўрнини топа олиши, ўз ишини бошлаши ва қайта мослашишлари учун улар билан доимий ишлаш, оилаларини қўллаб-қувватлашга тайёрмиз», — дея Федерика Могерини ЕИ таклифини эълон қилди.
У Афғонистонда тинчлик ўрнатилиши на Евроиттифоққа, на бошқа алоқадор шахслар, балки фақатгина афғонларнинг ўзларига тааллуқли эканини эслатиб ўтди.
«Бизнинг таклифимиз ҳали ҳам уруш олиб бораётганларга: тинчлик ва мулоқот йўлини танланг, тинч музокараларни бошлаш учун жасурлик кўрсатинг. Шунда биз сизни қўллаб-қувватлаймиз, ушбу мулоқотда шерикларга айланамиз. Ва биз ушбу урушни тугатиш ва тинчлик ўрнатишда сизларга ёрдам берамиз», — деди ЕИ Олий вакили.
«Афғонистон аллақачон жуда ўзгарди. Бу ўзгаришлар давом этиши, мустаҳкамланиши, ортга қайтмас бўлиши лозим», — деди Федерика Могерини.
У ЕИ ушбу жараёнда иқтисодий ва дипломатик ёрдами, шунингдек турли соҳаларда экспертлик билимларини таклиф қилишга тайёр эканини таъкидлади.
«Бугун Европа иттифоқи аниқ жараён учун эмас, балки ҳамкорлик учун олдинга чиқмоқда, чунки биз акс ҳолда қандай талафот содир бўлиши мумкинлигини биламиз», — деди ЕИ Олий вакили.
