Тошкент солиқ бошқармаси ташаббуси билан ДСБ ва пойтахтдаги 11 та ҳудудий давлат солиқ инспекциялари раҳбарларига тадбиркорлик фаолиятини бошлаган ва бошламоқчи бўлган 10 нафардан, жами 120 ёшлар бириктирилди. Бу ҳақда пойтахт ДСБ матбуот хизмати «Газета.uz"га хабар қилди.
«Солиқ хизмати органлари раҳбарлари ўзларига бириктирилган ёшларнинг тадбиркорлик фаолиятидаги илк қадамларидан бошлаб, токи юксак даражага етгунига қадар барча муаммоларини ҳал этиб, уларнинг ишончли ҳамкори бўлиб қолади», — дейилади хабарда.
Ушбу масалага бағишлаб ўтказилган йиғилишда мамлакатда кўзга кўринган тадбиркорлар, жумладан «Korzinka.uz» супермаркетлар тармоғи асосчиси Зафар Ҳошимов ҳамда «Ofice market» раҳбари Ҳусан Мамасаидов ўзларининг ҳаётий тажрибаларига оид фикр-мулоҳазалари, тавсия ва кўрсатмалари билан ўртоқлашди.
Шу билан биргаликда, ёш тадбиркорлар ҳам ўзларининг бизнес режаларини йиғилганларга намойиш этди. Ёшлар томонидан ўз бизнес режаларини амалга ошириш ва фаолиятини кенгайтириш учун банклардан имтиёзли кредитлар олиш, тадбиркорликни бошлаш учун жой ажратилиши ҳамда бошқа муаммоли масалалар ўртага ташланди.
Айни пайтда пойтахтда 10 минг нафарга яқин ёш ишбилармон ва 720 нафар ҳунарманд ўз тадбиркорлигини йўлга қўйган. Касб-ҳунар коллежларини тамомлаб, якка тартибдаги тадбиркор сифатида давлат рўйхатидан ўтган 1136 нафар ёш қатъий белгиланган солиқ бўйича жами 2,8 млрд сўмлик солиқ имтиёзларидан фойдаланган.
