Божхона ходимлари Ўзбекистонга товар моддий бойликларини ноқонуний олиб кириш ҳолатларига ўз вақтида чек қўймоқда. Бу ҳақда Божхона қўмитаси матбуот хизмати хабар берди.
Жумладан, Фарғона вилояти божхона бошқармасининг Контрабанда ва божхона қонунчилиги бузилишига қарши курашиш бўлими ходимлари томонидан қўшни мамлакат билан чегарадош худудларда ўтказилган тезкор тадбир давомида Ўзбекистонга товар моддий бойликларни ноқонуний йўллар билан олиб кираётган қонунбузарлар фаолиятига нуқта қўйилди.
Фарғона туманида ўзининг «Дамас» русумли автомашинасида ҳаракатланаётган фуқаро М.Х. белгиланган тартибда тўхтатилиб, холислар иштирокида текширувдан ўтказилди.
Натижада, автомашина салони ўриндиқлари остида тегишли ҳужжатларга эга бўлмаган 187,1 миллион сўмлик 116 дона уяли алоқа воситалари яширилганлиги аниқланди.
Мазкур ҳолат юзасидан текширув ҳаракатлари олиб борилмоқда.
