Пойтахтдаги Эпидемиология, микробиология ва юқумли касалликлар илмий-текшириш институти клиникасида коронавирус инфекциясига чалинган навбатдаги 2 нафар бемор буткул соғайди, дея хабар қилди Соғлиқни сақлаш вазирлиги матбуот хизмати. Улар Соғлиқни сақлаш вазирлиги масъуллари иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Соғайганлардан бири 19 ёшли қиз Тошкентдан бўлиб, коронавирус инфекциясига чалинган беморлар билан мулоқот орқали касалликни юқтириб олган.
Иккинчи бемор эса Россиядан чартер рейс орқали пойтахтга олиб келинган ва карантинга олинган. Коронавирус инфекцияси аниқлангач, Эпидемиология, микробиология ва юқумли касалликлари илмий-текшириш институти клиникасига ётқизилган. Сўнгги текширувлар ушбу беморларда инфекция йўқлигини кўрсатди.
Айни пайтга қадар мамлакат бўйлаб коронавирус инфекциясидан жами 240 нафар бемор тўлиқ соғайди.
