27 апрель куни кечқурун Бухоро вилоятида содир бўлган кучли шамол ва ёмғир натижасида газ қувурлари ва газ таъминоти тизимининг бошқа объектларида 120 дан ортиқ авария ҳолатлари аниқланган. Бу ҳақда «Ҳудудгазтаъминот» АЖнинг матбуот хизмати хабар берди.
Хабарда айтилишича, «Шофиркон-1», «Шофиркон-2», «Пешку-1», «Пешку-2», «Ромитан-2», «Ромитан-3», «Ромитан-4», «Жондор-1», «Известковый», «Ғиждувон», «Шофиркон-2» каби газ тақсимлаш станциялари (ГРС) ва «Ғиждувон», «Олот» ва «Қоракўл» каби йўналишлар фавқулодда ўчирилган.
138 мингдан ортиқ хонадон вақтинча газ таъминотидан узилган.
Жумладан, Навоий вилоятининг Конимех, Навбаҳор, Қизилтепа, Кармана туманларида 21 557 та, Сирдарё вилоятининг Боёвут туманида 6100 та, Бухоро вилоятининг Бухоро, Когон, Ромитан, Пешку, Ғиждувон, Шофиркан, Қоровулбозор, Вобкент, Жондор, Қоракўл ва Олот туманларида 110 490 та, Самарқанд вилоятининг Каттақўрғон, Пахтачи, Иштихон, Нарпай туманларида 141 та хонадон вақтинча газсиз қолган.
«Ҳудудгазтаъминот» АЖнинг ҳудудлардаги таркибий бўлинмаларининг тезкор тиклаш гуруҳлари табиий офат сабабли зарар етган жойларда таъмирлаш ишларини бошлаб юборишган.
Аҳолидан газ таъминоти тизимида носозликлар, газ сизиб чиқиши ёки бошқа фавқулодда вазиятлар аниқланганда, дарҳол авария-диспетчерлик хизматининг 104 ёки 1104, 71 200−08−04 рақамларига хабар бериш сўралган.
