19 май соат 10:00 ҳолатига кўра, Ўзбекистонда коронавирус инфекцияси қайд этилганлар сони 2802 нафарни ташкил қилмоқда. Бу ҳақда Соғлиқни сақлаш вазирлиги хабар қилди.
Унга кўра, қайд этилган янги касалланиш ҳолатларининг 10 нафари хориждан келган фуқароларда (улардан 7 нафари Россиядан келган ва 3 нафари халқаро юк ташувчи автомашина ҳайдовчиси) ҳамда 1 нафари олдиндан карантинда бўлган фуқаролар орасидан аниқланган.
Бош давлат санитария инспектори Нурмат Отабеков сўзларига кўра, ҳозирда Республика бўйлаб коронавирус инфекциясидан 475 киши даволанмоқда, улардан 6 нафарининг аҳволи оғир, деб баҳоланмоқда.
Айни пайтда 48 мингдан ортиқ фуқаро карантин муддатларини ўтаяпти. Уларнинг 16 мингдан ортиқроғи стационар шароитида, қолган 32 минг нафари уй шароитида карантин тадбирлари билан қамраб олинган.
Шунингдек, Республикадаги мавжуд вирусологик лабораторияларда 515 мингтадан ортиқ тест синовлари ўтказилди. Кечаги куннинг ўзида 12,8 мингдан кўпроқ вирусологик текширишлар ўтказилди, деди Нурмат Отабеков.
Коронавирус инфекциясидан соғайганлар сони ҳозирда 2314 кишини ташкил этмоқда. Ўн уч киши ҳаётдан кўз юмган.
