Тошкентда коронавирус беморлари манзилли ва касаллик ўчоғининг ўзида локализация қилиниши сабабли пойтахт «сариқ» ҳудуддан «қизил» ҳудудга ўтказилмаяпти, дея изоҳ берди Санитария-эпидемиологик осойишталик агентлиги директорининг биринчи ўринбосари Ботир Қурбонов.
Брифингда Ботир Қурбонов «Нима учун пойтахтда беморлар аниқлаётганига қарамай, Тошкент „сариқ“ ҳудудда қолмоқда?» деган саволга жавоб берар экан, пойтахтда касаллик аниқланган туман эмас, балки инфекция ўчоғининг ўзи изоляция қилинаётгани, бундай қилиш касалликка қарши тадбирларни амалга оширишда самаралироқ эканлигини таъкидлади.
«Тошкент шаҳрида касаллик қайд этилишига қарамасдан, бугунги кунда Республика махсус комиссиянинг кўрсатмасига биноан. бутунлай Тошкент шаҳрини ёки бир туманни „қизил“ ранг билан белгилашдан кўра касаллик ўчоғининг ўзини, яъни касаллик қайд этилган объект ёки муассаса, қолаверса, касаллик қайд этилган кўча ва мавзе ёки маҳалланинг „қизил“ ҳудудга белгиланиши ушбу касалликка қарши тадбирларнинг самарали ва тўлақонли амалга оширилишига ўз ҳиссасини қўшади,» — деди Ботир Қурбонов.
Шу билан бирга, мазкур ёндашувни амалга оширган ҳолда бугунги кунда Тошкент шаҳридаги 513 маҳалладан 42 таси «қизил», 132 таси «сариқ» ва 339 таси «яшил» тоифага киритилгани маълум бўлди.
«Ушбу ҳудудларда тадбирларнинг манзилли ва ўз жойида — касаллик ўчоғида олиб борилиши касалликнинг тезкор локализация қилиниши ва тартибга солиниши, аҳоли ўртасида саросимага олиб келмаслиги учун, профилактик тадбирларни самарали ва тўлақонли ўтказилишига таъсир кўрсатади», — дея якунлади ўз жавобини Б.Қурбонов.
Маълумот учун, Республика махсус комиссиянинг ахборотига кўра, 8 май кунидан бошлаб Тошкент шаҳрида ва Республика ҳудудларида туман ва шаҳарлар даражасида тоифаларга ажратиш бошлаган. Унда Тошкент шаҳрини «қизил», «сариқ» ва «яшил» тоифаларга ажратиш эпидемиологик вазиятдан келиб чиққан ҳолда Санитария-эпидемиологик осойишталик агентлигининг таклифи асосида маҳаллалар, даҳалар, мавзелар кесимида амалга оширилиши мумкинлиги қайд этилган.
