Қурилиш вазирлиги Қаршидаги юк кўтарувчи конструкциялар қулаб тушган «Насаф-Травел» компаниясига тегишли бинонинг қурилиши ноқонуний олиб борилгани маълум қилди.
Эслатиб ўтамиз, 23 июнь куни Қарши шаҳар «Насаф Травел» меҳмонхонаси биносининг чап томонидан қўшимча қурилаётган 5 қаватли бинонинг юк кўтарувчи темир-бетон конструкциялари қулаб тушган эди. Бунинг оқибатида, 1 нафар ишчи-ходим воқеа жойида вафот этганди. ФВВ қутқарувчилари 4 нафар фуқарони қутқаришга муваффақ бўлган.
Қурилиш вазирлигининг хабарида таъкидланишича, Қашқадарё вилоят Қурилиш соҳасида ҳудудий назорат инспекцияси томонидан ўрганиш ишлари олиб борилганида, «Насаф-Травел» компаниясига тегишли ушбу объектидаги қурилиш ишлари рўйхатга олинмасдан, ноқонуний олиб борилгани маълум бўлди.
Қайд этилишича, «Насаф-Травел» компанияси Қашқадарё вилоят Қурилиш соҳасида ҳудудий назорат инспекциясини белгиланган тартибга мувоффиқ хабардор этмаган.
«Инспекция томонидан ушбу объект қурилиши бўйича буюртмачи „Насаф-Травел“ компаниясини бир неча бор огоҳлантирган бўлишига қарамасдан, ноқонуний равишда объектда қурилиш-монтаж ишларини давом эттирган. Ва қурилиш меъёрларининг қўпол равишда бузилиши натижасида мазкур ҳолат келиб чиққан. Тадбиркорлик субъекти қонунда кўрсатилган эркинликларни суиистеъмол қилган. Ноқонуний қурилиш ишларини амалга оширган», — дейилади хабарда.
