Қорақалпоғистон Республикаси Беруний тумани ҳокимлиги туманнинг Абай ОФЙ ҳудудидаги Қуролпа аҳоли манзилида катта йўл бўйида содир бўлган тартибсизлик бўйича расмий маълумот берди, дея хабар қилди «Қарақалпақ 24» Telegram-канали.
20 июль куни YouTube видеохостингида аҳоли магистрал йўлни тўсиб қўйгани акс этган видеоёзув эълон қилинган эди. Унда юк ташувчи ва енгил автомобиллардан иборат катта тирбандлик ҳосил бўлганини кўриш мумкин.
Туман ҳокимлиги ахборот хизматининг қайд этилишича, томорқаларга сув етиб бормаслиги ва 10 кун давомида Найман каналига сув келмагани аҳоли норозилигига сабаб бўлган. Тартибсизликлар жойига Беруний тумани ҳокими ва мутасадди раҳбарлар етиб бориб, қисқа вақт ичида масала ўз ечимини топган, Найман каналига сув етказиб берилган.
«Беруний тумани қишлоқ ҳўжалиги бўйича 13 та ҳудудга бўлинган бўлиб, уларда навбатма-навбат суғориш тизими жорий қилинган. Ҳозирги кунда ҳароратнинг юқорилиги экинларнинг тез сувсизланишини келтириб чиқармоқда», — дейилади хабарда.
Daryo.uz нашрининг ёзишича, фуқароларнинг бир неча соат давомида Найман кўприги яқинида магистрал йўлни тўсиши натижасида узундан узоқ тирбандлик ҳосил бўлган.
