Ўзбекистонлик мутахассислар Россия ва Хитойда яратилган COVID-19 га қарши вакциналарни қўллаш имкониятларини ўрганишмоқда, дея маълум қилди сешанба куни коронавирусга қарши кураш бўйича тезкор штаб аъзоси Рустам Икромов.
Эслатиб ўтамиз, ўтган ҳафта президент Шавкат Мирзиёев бош вазир ўринбосари Беҳзод Мусаевга бир ҳафта ичида ва вакциналар сотиб олиш Ўзбекистон аҳолисини эмлаш имкониятларини ўрганишни топширган эди. Вакциналар ишлаб чиқарилиши яқин орада Хитой, Ҳиндистон, Буюк Британия ва Россияда бошланиши кутилмоқда.
«Ҳозирда Россия ва Хитойда ишлаб чиқарилган вакциналарни ўрганиш бўйича тадқиқотлар олиб борилмоқда» — деди Рустам Икромов онлайн-брифингда, чет элдан вакциналарни сотиб олиш режалари ҳақидаги саволга жавоб берар экан. Унинг сўзларига кўра, сешанба куни видеоконференция давомида Хитойда ишлаб чиқарилган вакцинани қўллаш бўйича фикр алмашилди.
«Ушбу музокаралар натижаларига кўра ҳукуматга мамлакатда вакцинани қўллаш даражаси тўғрисида маълумот берилади», — дея қўшимча қилди штаб аъзоси.
Аввалроқ, Россия президенти Владимир Путин мамлакат мамлакатда коронавирус инфекциясига қарши дунёдаги биринчи вакцина рўйхатга олганини эълон қилган эди. Россия вакцинасига «Спутник V» номи берилди.
ЖССТ номзод-вакциналар рўйхатини (PDF) охирги марта 10 август куни янгилади. Ушбу рўйхатда Гамалея номидаги марказ томонидан ишлаб чиқилган вакцина синовларнинг биринчи босқичида деб кўрсатилган.
Россиянинг тўғридан-тўғри инвестициялаш фонди раҳбари Кирилл Дмитриевнинг сўзларига кўра, Россия аллақачон рўйхатга олинган вакцина тўғрисидаги маълумотларни ЖССТга юборган. «Бу яқин орада пайдо бўлади (ЖССТ рўйхатида — таҳр.)», — деди у.
«Вакцина Россияда расмий рўйхатдан ўтганлиги сабабли, рўйхатга олиш рақами ва ҳужжатлари мавжуд. Биз яқинда ЖССТ ўз рўйхатини янгилайди деб умид қиламиз, чунки улар Россия Федерацияси Соғлиқни сақлаш вазирлигидан маълумот олишди», — дея қўшимча қилди Кирилл Дмитриев.
Эслатиб ўтамиз, июль ойи охирида «Газета.uz», ўша пайтда клиник синовларнинг учинчи, яъни якуний босқичида бўлган бешта номзод вакцина ҳақида ёзган эди. Улар Буюк Британия, АҚШ, Хитой ва Германия олимлари жамоалари томонидан ишлаб чиқилган.
