Россияда уй-жойга эга бўлган чет элликларга бошқа чет эл фуқароларини мезбон сифатида ўз уйига жойлаштириш, уларни ўз уйида рўйхатдан ўтказиш ҳуқуқини берувчи федерал қонун кучга кирди. Бу ҳақда РИА Новости хабар берди.
Июнь ойида Россия президенти Владимир Путин бу ҳақдаги тегишли ҳужжатни имзолаган. Бундан аввал, «Чет эл фуқаролари ва фуқаролиги бўлмаган шахсларни Россия Федерациясида миграцион рўйхатдан ўтказиш тўғрисида» ги қонунга тегишли ўзгаришлар киритилган.
Янги тартибга кўра, Россияда турар жойи бўлган ва Россия фуқаролигига эга бўлмаган шахс мезбон сифатида бошқа чет эл фуқаросини ўз уйига жойлаштириши ёки уни ўз уйида яшаш жойи сифатида рўйхатдан ўтказиш ҳуқуқига эга.
Шунингдек, ушбу қонун ўз ватандошлари ва уларнинг оила аъзоларининг Россияга ихтиёрий равишда кўчиб келишига кўмаклашиш бўйича давлат дастурида иштирок этаётган чет элликларни келган кунидан бошлаб 30 кундан ортиқ бўлмаган муддатга рўйхатдан ўтиш мажбуриятидан озод қилади.
