Ўзбекистон синовларнинг учинчи — охирги босқичидан сўнг коронавирусга қарши вакцинани ишлаб чиқариш ва экспорт қилишни режалаштирмоқда. Бу ҳақда 25 сентябрь куни Халқаро пресс-клуб йиғилишида Санитария-эпидемиологик осойишталик агентлиги директори, соғлиқни сақлаш вазирининг биринчи ўринбосари Баҳодир Юсупалиев маълум қилди.
Аввалроқ коронавирусга қарши вакцина ишлаб чиққан икки Хитой компанияси Ўзбекистонда синовларнинг учинчи босқичини биргаликда ўтказишни таклиф қилган эди. Инновацион ривожлантириш вазирлиги Sinopharm ва Zhifei Longcom билан шартномалар имзолади.
«Хитойнинг иккита компанияси вакциналарини Ўзбекистонга жалб қилиш ва [ушбу дори воситаларининг] клиник синовларининг учинчи босқичида иштирок этиш [режалаштирилмоқда]. Сўнгра ўзимизда ушбу вакциналарни ишлаб чиқариш масаласи кўтарилади, бу эса импортнинг қисқаришига олиб келади, бундан ташқари биз уларни қўшни мамлакатларга экспорт қилишимиз мумкин бўлади», — деди Баҳодир Юсупалиев.
Унинг сўзларига кўра, Ўзбекистон Россия компанияларига ҳам Россия вакцинасини биргаликда синовдан ўтказишни таклиф қилган. «Бугун биз уларнинг жавобини кутмоқдамиз. Ўйлайманки, биз бир вақтнинг ўзида улар билан ҳам ишлаймиз», — деди у.
Аввалроқ «Газета.uz» Россия тўғридан тўғри инвестициялар жамғармаси (РТИЖ) ва Laxisam фармацевтика компанияси Ўзбекистонга 35 миллион доза коронавирусга қарши «Спутник V» вакцинасини юборишга келишувга эришгани ҳақида хабар берган эди.
Августда эса Ўзбекистоннинг ЖССТнинг COVAX (коронавирусга қарши вакцина қилиш) дастурига қўшилгани маълум қилинди.
