Якшанба куни Навоий марказида вилоят ҳокимлиги яқинига ўрнатилган Янги йил арчаси ёниб кетди. Ҳодиса акс этган видеоёзувлар ижтимоий тармоқларда пайдо бўлди.
Навоий вилояти ҳокимлиги матбуот хизматининг Фавқулодда вазиятлар бошқармаси маълумотларини эълон қилди. Унда ёнғиннинг келиб чиқишига ёғингарчилик натижасида намланган электр кабелларининг қисқа туташуви сабаб бўлиши тахмин қилинаётгани айтилган.
Қайд этилишича, марказий арча ўрнатилган жойда иккита ёнғин-қутқарув отряди ва битта ўт ўчириш автоэкипажининг навбатчилиги ташкил этилган бўлиб, улар томонидан соат 19:07да келиб чиққан ёнғин 19:20да ўчирилган.
Фото: Telegram.
Бир кун олдин Термизда янги йил арчаси қулагани ҳақида хабар берилган эди. 23 декабрь куни эса Фарғонада марказий бозорга ўрнатилган Янги йил арчасида ёнғин чиққанди.
