Қирғизистон сақлаш шароити йўқлиги учун Pfizer вакцинасини ишлатишдан бош тортди
Қирғизистон техник сабабларга кўра коронавирусга қарши эмлашда Pfizer’дан воз кечди. Бу ҳақда республика соғлиқни сақлаш вазири Aлимқодир Бейшеналиев маълум қилди. «Бизга АҚШнинг Pfizer вакцинасини таклиф қилишди, уни минус 70 даража ҳароратда сақлаш керак. Бизда бундай музлаткичлар йўқ, уларнинг ҳар бири 4 минг доллар туради. Бюджетда бундай пул йўқ ва биз рад этишга мажбур бўлдик», — деди у. Бейшеналиевнинг таъкидлашича, COVAX дастури доирасида Қирғизистон Pfizer томонидан ишлаб чиқарилган 1 млн дозадан ортиқ вакцинани бепул олиши керак эди, бунинг учун эса вакцинани сақлаш учун 2 млн долларлик ускуналарни сотиб олиниши керак. Яқин келажакда Бишкек коронавирус дори-дармонларини сақлаш учун янада мақбул шароитга эга бўлган бошқа бир ариза топширишни ният қилмоқда. Вазир, шунингдек, Спутник V вакцинасини республикага етказиб бериш бўйича Россия билан музокараларни давом эттираётганини айтди. Маълумотларга кўра, Россиянинг вакцинаси минус 2 дан минус 18 даражагача бўлган ҳароратда сақланиши мумкин. — ТАСС.
Туркия коронавирусга қарши оммавий эмлашнинг иккинчи босқичига ўтди
Туркия ҳукумати аҳолини коронавирусга қарши оммавий эмлашнинг иккинчи босқичига ўтди. Эмлаш тиббиёт ходимларидан сўнг, қариялар уйлари ва қариялар уйлари ходимлари ҳамда ногиронлар уйларида бошланган. Туркия Соғлиқни сақлаш вазирлигининг статистик маълумотларига кўра, шу кунгача мамлакатда 867 мингдан ортиқ одам коронавирусга қарши эмланган. Мамлакатда Хитойнинг Sinovac Biotech фармацевтика корпорациясининг CoronaVac вакцинаси рўйхатдан ўтган. — Haber Turk.
Германия карантин чораларини 15 февралга қадар узайтирмоқчи
Германия ҳукумати мамлакатда амалдаги карантин чекловларини камида 15 февралгача узайтирмоқчи. Маълум қилинишича, дўконларда ва жамоат транспортида бутун мамлакат бўйлаб FFP2, KN95 респиратор ниқоблари ёки бир марталик тиббий маскаларни тақишни мажбур қилишни режалаштирмоқда. Мактаблар ва болалар боғчалари, махсус ҳолатлардан ташқари, 15 февралгача ёпиқ қолади. Таъкидланишича, коронавируснинг янги мутациялари «болалар ва ўспиринлар орасида кўпроқ тарқалмоқда». — Bild.
Бавария аҳолиси ниқоб ўрнига FFP2 респиратор ниқобларни тақишга мажбурланади. Энди Бавария аҳолиси дўконларда, транспортда ва бошқа жамоат жойларида юқори ҳимояланган нафас олиш мосламаларини кийишлари керак бўлади. Бундан ташқари, оғир вазиятда бўлган фуқаролар учун бепул респиратор ниқоблар учун 34 млн ваучерлар берилади.
Сингапурда февраль ойидан бошлаб коронавирусга қарши бепул оммавий вакцинация бошланади
Сингапурда келаси ойдан бошлаб коронавирусга қарши бепул вакцинация бошланади. Ҳар куни 70 мингтагача киши эмланади. Республика Соғлиқни сақлаш вазирлиги эмлаш мумкин бўлган бир неча ўнлаб марказларни яратмоқчи. Хусусан, ушбу мақсадлар учун спорт заллари ва мактабларнинг биноларидан фойдаланиш режалаштирилган. Шу билан бирга, бундай марказ 18 январь куни маҳаллий Чанги аэропортининг терминалларидан бирида очилган. Махсус муассасаларда, масалан, қариялар уйларида эмлашни амалга оширадиган мобил гуруҳлар тузилади. — ТАСС.
