Америка Қўшма Штатлари армиясининг муҳандислар корпуси (United States Army Corps of Engineers, USACE) гидротехник иншоотларнинг хавфсиз ишлашини мониторинг қилиш бўйича мутахассислари гуруҳи 15 март куни Ўзбекистонга етиб келди, дея хабар берди «Дунё» ахборот агентлиги.
Мутахассислар Сув хўжалиги вазирлиги, «Ўзбекгидроэнерго», «Давсувхўжаликназорат» инспекцияси ва бошқа тузилмалар вакиллари билан биргаликда 28 мартга қадар Қашқадарё ва Сурхондарё вилоятларидаги Гиссарак ва Тўполон тўғонларини текширадилар.
Мутахассислар гидротехника иншоотларининг жисмоний ҳолати ва яхлитлигини ўрганадилар, уларнинг ишлашида юзага келиши мумкин бўлган хавфларни таҳлил қиладилар. Натижалар асосида юзага келиши мумкин бўлган носозликларнинг моделларини ишлаб чиқиш, оқибатларини таҳлил қилиш, шунингдек, сув ўтказгичларининг техник мониторинги ва хавфсизлиги даражасини ошириш бўйича тавсияларни ишлаб чиқиш режалаштирилган.
Январь ойи бошида USACE мутахассислари тўғон хавфсизлиги учун масъул бўлган ўзбекистонлик мутахассислар учун онлайн тренинглар ўтказдилар.
USACE 1775 йилда ташкил этилган бўлиб, АҚШда тўғонларнинг режалари, лойиҳалари, қурилиши ва тошқинлардан муҳофаза қилишга ҳамда табиий экотизимларнинг биологик хилма-хиллигини тиклашда масъул ҳисобланади. Шунингдек, корпус дунёнинг 110 мамлакатида гидротехника иншоотларини лойиҳалаштириш, қуриш, хавфсизлик бўйича тадқиқотлар ва дамбаларнинг ёрилиши оқибатларини бартараф этишда кўмаклашади.
