Лойиҳалаштирилаётган Тошкент-Самарқанд ва Тошкент-Андижон пуллик йўлларидан ўтиш нархи 5−6 доллар (эквивалентда) атрофида бўлиши кутилмоқда. Бу ҳақда Давлат-хусусий шерикликни ривожлантириш агентлиги вакили ЎзЛиДеП пресс-клубида маълум қилди.
Унинг сўзларига кўра, Тошкентдан Фарғона водийсига бориш йўлининг нархи уч қисмга бўлинади (дастлабки ҳисоб-китобларга кўра):
- Тошкент-Ангрен — 1,7 доллар;
- Ангрен-Қўқон — 2 доллар;
- Қўқон-Андижон — 1,6 доллар.
Юк транспорти учун нарх қимматроқ бўлади. Мисол учун, Тошкентдан Андижонгача бўлган йўл юк машиналари учун 20 долларга тушиши мумкин.
Пуллик йўлларда ҳаракатланишнинг максимал тезлиги 120−150 км/с бўлиши мумкин, дейди агентлик вакили. Айрим тоғли ҳудудларда бу 60−70 км/сга тенг бўлиши мумкин.
Эслатиб ўтамиз, ҳозирда Ўзбекистон автойўлларида ҳаракатланишнинг рухсат берилган тезлиги алоҳида йўл қисмларида ўрнатилган белгиларга мувофиқ 110 км/с (ЙҲҚга кўра — 100 км/с).
2018 йилнинг охирида қабул қилинган Вазирлар маҳкамаси қарорига кўра, 2020 йилнинг 1 январидан бошлаб Ўзбекистонда пуллик йўлларни ДХШ асосида жорий қилиш назарда тутилган эди.
Бир йил ўтиб, собиқ транспорт вазири Элъёр Ганиев Тошкент-Самарқанд пуллик трассасининг қурилиши йўналишнинг инвестор томонидан кўрсатилган нархи қимматлиги сабабли кечикаётганлигини маълум қилган эди.
