29−30 июнь кунлари Ботаника боғида Ёшлар ва талабалар форуми бўлиб ўтди. Форумнинг иккинчи кунида президент Шавкат Мирзиёев ёшлар билан учрашди.
Rost24 нашри Ёшлар ишлари агентлиги директори Алишер Саъдуллаевнинг форумнинг биринчи кунида берган интервьюсида «тадбир қатнашчилари коронавирусга қарши вакцинация қилинган» деган сўзларини келтириб, маълумотни нотўғри, дея таъкидланган.
Ёшлар ишлари агентлиги «Газета.uz»га ушбу ҳолат юзасидан маълумот берди.
«Форумнинг ташкил қилиниши анча олдин тасдиқланган ва иштирокчилар вакцинация қилиниши белгиланган, лекин эмлашдан сўнг айрим ҳолатларда инсон организмида тана ҳароратининг кўтарилишини инобатга олиб, вакцинация жараёнлари ўтказилмаган. Интервью жараёнида мазкур маълумот ҳали тасдиқланманганлиги учун жавоб тушунмовчиликларга олиб келган», — дейилади баёнотда.
Агентликнинг маълум қилишича, тадбирда қатнашиш учун узоқ ҳудудлардан келган ёшларга қулайлик яратиш мақсадида, форумнинг барча иштирокчилари боғга кириш эшиклари олдида катта майдонда бепул ПЗР тестидан ўтказилган.
«Таъкидлаш лозимки, 29−30 июнь кунлари бўлиб ўтган Ёшлар ва талабалар форуми хавфсиз шароитда ташкил қилинди», — дея хулоса қилади агентлик.
