Россия президенти Владимир Путин ҳукумат аъзолари билан йиғилишда COVID-19 билан боғлиқ вазият туфайли бутун Россия бўйлаб 30 октябрдан 7 ноябрга қадар ишланмайдиган кунлар жорий этилиши ҳақида эълон қилди. Бу ҳақда «Россия 24» телеканалида хабар қилинди.
Таъкидланишича, ходимларнинг ойлик маошлари сақланиб қолади, ишланмайдиган кунлар узайтирилиши мумкин. Шунингдек, «оғир» ҳудудларда бу муддат 23 октябрдан бошланиши мумкин.
Владимир Путин аҳолини коронавирусга қарши эмлаш жараёни ҳали ҳам сустлигича қолаётгани, шунинг учун касаллик тарқали суръатларини «синдириш» лозимлигини таъкидлади. У COVID-19 га қарши тест ўтказиш ҳажмини кенгайтириш касалланишлар сонини қисқартиришга ёрдамлашиши мумкинлигини айтиб ўтди. «Вирус тарқалиш занжирини узиш керак», — деди Россия президенти. Путин яқлари касалликка чалинган россияликлардан уйда қолишни сўради.
Мамлакат бош вазири ўринбосари Татьяна Голикованинг маълум қилишича, 35 та ҳудудда COVID-19 га чалиниш ҳолатлари ошган. Уларнинг 7 тасида — Ставропол, Адигея, Челябинск, Орёл, Амур, Самара, Саратов вилоятларида касалхоналардаги бўш ўринларнинг 95 фоизи банд. Россия бўйича бу кўрсаткич 86,6 фоизни ташкил этмоқда.
Ҳукумат раисининг биринчи ўринбосари Андрей Белорусов ишланмайдиган кунларнинг жорий этилишидан бизнес 60 млрд рублга яқинроқ зарар кўришини таъкидлади.
16 октябрь куни Россияда илк бор кунига мингтадан кўп коронавирусдан ўлим ҳолати қайд этилди. Санкт-Петербургда касалланиш ва ўлимлар сони кўпайиши ортидан кафе, ресторан, музей, контсерт ва бошқа жамоат жойларига ташриф буюриш учун QR-кодлар жорий этилди. Москвада эса 60 ёшдан ошган эмланмаган фуқаролар учун ўзини изоляция қилиш режими эълон қилинди. Улар февралгача уйда қолишлари керак.
