Шавкат Мирзиёев қисқа муддатли таътилга чиқди
Президент Шавкат Мирзиёев 5 январдан қисқа муддатли меҳнат таътилига чиқди.
Фуқароларни текшириш учун ИИБга олиб бориш тартиби бекор қилиниши кутилмоқда
Тараққиёт стратегияси лойиҳасига асосан, текшириш учун фуқарони ички ишлар бўлимига олиб бориш тартиби бекор қилиниши кутилмоқда. Унга кўра, апрель ойигача «Е-патруль» тизими жорий этилиб, барча маълумотлар жойида текширилиши кўзланган. Стратегия лойиҳасида жиноят ва маъмурий ҳуқуқбузарликлар ҳақида хабар бериш ва рўйхатга олиш учун «Е-ҳуқуқбузарлик» ягона ахборот тизимини ташкил этиш ҳам таклиф этилган.
Урганчдан Оқтовга, Тошкентдан Олмаотага, Нукусдан Актобега парвозлар бекор қилинди
«Uzbekistan Airways» компанияси 5 январь куни Урганчдан Оқтовга парвозлар бекор қилинганини маълум қилди. Бу Оқтов халқаро аэропортининг халқаро парвозларни қабул қилишни ва амалга оширишни ёпганлиги билан боғлиқ. Шунингдек, 6 январга мўлжалланган Тошкентдан Олмаотага, Нукусдан Актобега парвозлар ҳам бекор қилинган.
Ўзбекистонда умра сафарларига тайёргарлик бошланди
Ўзбекистон мусулмонлари идораси 2022 йилги умра саёҳати мавсумига тайёргарлик бошланганини маълум қилди. Муфтий Нуриддин Холиқназаров Саудия Арабистонидаги «Abu Sarhad» ҳамкор ширкати билан бу ҳақда шартнома имзолади. Навбат асосида белгиланган тўловларни амалга оширган, тегишли вакцинани олган ва Саудия Арабистонининг карантин талабларини бажарган фуқаролар тартиб билан сафарга жўнатилади.
Бухоро вилоятида 270 МВт қувватга эга ИЭС ишга туширилди
Бухоро вилоятида янги 270 МВт қувватга эга газ поршенли ИЭСнинг биринчи энергия блоки ишга туширилди. ИЭС Туркиянинг Aksa Enerji компанияси томонидан ДХШ асосида қурилган.
Май ойидан бери ёшларнинг 5,2 млрд сўмлик халқаро имтиҳон харажатлари компенсация қилинган
1 майдан бери 2848 нафар ёшларга халқаро имтиҳонлар учун харажатлари компенсация қилинди. Бунда жами 5 млрд 218 млн сўмдан ортиқ харажат қоплаб берилган. Компенсация олганларнинг қарийб 92% IELTS имтиҳонини топширган. Ҳудудлар бўйича энг кўп компенсация Тошкент шаҳри ёшларига тўланган.
Давлат хизматлари маркази хорижга чиқиш паспортини беришни бошлади (рўйхат)
Эндиликда ички ишлар бўлимларидан ташқари, айрим давлат хизматлари марказларида ҳам хорижга чиқиш биометрик паспортини олиш мумкин. Йил охирига келиб, бундай имконият барча ДХМларда пайдо бўлади.
Жисмоний шахслар учун ижара тўловининг минимал ставкалари ўзгарди
2022 йил 1 январдан бошлаб бинолар ёки автомашинани ижарага берувчи жисмоний шахслар учун ижара тўловининг энг кам ставкалари оширилди. Халқ депутатлари Кенгашлари ставкаларига ошириш коэффициентларини қўллаш ҳуқуқини сақлаб қолди.
Талабалар қулайлиги учун қўшимча авиарейслар амалга оширилади
Uzbekistan Airways компанияси талабаларга қулайлик яратиш учун 7−9 январь кунлари Урганч, Бухоро, Наманган, Қарши ва Нукус шаҳарларидан Тошкентга қўшимча рейслар ташкиллаштиради.
