Жорий йилнинг биринчи чорагида Ўзбекистон глобал COVAX механизми доирасида коронавирусга қарши 11 млн дозадан ортиқ вакцинани беғараз тарзда қабул қилиб олиши керак. Бу ҳақда Тошкент аэропортида Pfizer вакцинасининг навбатдаги партиясини топшириш маросимида БМТ Болалар жамғармасининг (ЮНИСЕФ) Ўзбекистондаги ваколатхонаси раҳбари Мунир Мамедзаде маълум қилди.
«Биз мазкур механизм доирасида Ўзбекистонга етказиб берилган вакциналар 10 млн дозадан ортиқни ташкил этганининг гувоҳига айланиб турганимиздан мамнунмиз», — деди у. Ўзбекистон AstraZeneca, Moderna, Pfizer/BioNTech ва Sinovac вакциналарини COVAX платформаси орқали қабул қилди.
«ЮНИСЕФ Ўзбекистон ҳукуматига COVID-19`га қарши вакциналарни етказиб беришда кўмаклашишда давом этади», — деди жамғарма вакили.
«ЮНИСЕФ таъминот ва логистика жараёнини бошқарадиган COVAX механизми орқали дунёнинг 144 мамлакат ва ҳудудига 1 млрд дозадан ортиқ коронавирусга қарши вакцина етказиб берилди», — дея қўшимча қилди Мунир Мамедзаде.
Унинг таъкидлашича: «Вакциналар самара беради, улар касалликнинг оғир ўтиши ва касалхонага етишни олдини олади ва одамлар ҳаётини сақлаб қолади. Айниқса, ўз вақтида эмланиш ва мамлакатда омикрон штаммининг тез тарқалишини ҳисобга олган ҳолда профилактика чораси сифатида санитария қоидаларига риоя қилиш жуда муҳимдир».
«Газета.uz»га ЮНИСЕФ ваколатхонаси матбуот хизматининг аниқлик киритишича, биринчи чоракда COVAX бўйича — Pfizer/BioNTech ва Moderna вакциналари етказиб берилади.
