Битта постда 3 йил ишлаган божхоначилар ротация қилинади
Президент пайшанба кунги йиғилишда божхоначиларнинг ҳалол ишлашини таъминлаш мақсадида битта постда 3 йил ишлаган ходимлар ротация қилинишини айтди. Қолаверса, тизимдаги ходимлар даромади ва мол-мулки декларация қилинади, 1 мартдан эса барча божхона ходимлари фақат очиқ танлов асосида ишга қабул қилинади.
22 та божхона постини замонавий ускуналар билан жиҳозлашга 370 млрд сўм ажратилади
Ўзбекистонга йил бошидан бери 364 кг гиёҳвандлик воситаси ҳамда 181 млрд сўмлик товарлар ноқонуний кириб келишининг олди олинган. Шавкат Мирзиёев контрабандага қарши курашиш мақсадида 80 фоиз товар кириб келадиган 22 та божхона постини 3D-сканер, рентген аппарати, видеокузатув камераси, транспорт тарозиси каби ускуналар билан жиҳозлашга кўрсатма берди. Бунинг учун эса 370 млрд сўм йўналтирилади.
Президент божхона хизматларини 2023 йилда тўлиқ рақамлаштиришни буюрди
Президент божхона маъмурчилигини янада такомиллаштириш масалаларига бағишланган йиғилишда «Божхона бошқа давлат идораларига намуна бўлиши керак», дея қайд этди. Президент топшириғига кўра, йил якунига қадар божхона кўриги жараёнларини тўлиқ қамраб олган электрон тизим ишга туширилади.
Божхона ходимлари ва уларнинг фарзандларига ОТМга киришда алоҳида квота ажратилади
Шавкат Мирзиёев раислигида бўлиб ўтаётган божхона тизими трансформациясига бағишланган йиғилишда божхона ходимларнинг ижтимоий ҳимоясини кучайтириш масалаларига эътибор қаратилди. Жумладан, божхона ходимлари ва уларнинг фарзандлари учун олий ўқув юртларига киришда алоҳида квота ажратилиши маълум қилинди.
Бобур кўчасини реконструкция қилиш режалаштирилмоқда
Тошкентдаги Бобур кўчасини реконструкция қилиш режалаштирилмоқда. Яккасарой тумани ҳокими Анвар Сайфутдинов фуқароларни бинолар фасадини янгилаш, велосипед йўлакларини ташкил этиш, пиёдалар йўлакларини кўкаламзорлаштиришни ўз ичига олган дастлабки лойиҳа билан таништирди. Реконструкция моддий маданий мерос обектлари, жумладан, туман ҳокимлиги, «ТошкентбошпланЛИТИ» ИТИ ва 7-уйга ҳам тааллуқли.
ЙТҲлар сони йил давомида 43 фоизга, ўлим — 24 фоизга кўпайди
2020 йилда пандемия даврида бахтсиз ҳодисалар ҳамда уларда ҳалок бўлган ва жароҳатлар сони бўйича статистик маълумотлар камайганидан сўнг, 2021 йилда бу кўрсаткичлар кескин ошди. Бахтсиз ҳодисаларнинг асосий сабаблари тезликни ошириш ва ҳаракатни нотўғри ташкил этишдир. Пиёдалар ўтиш йўлакларида қанча одам уриб юборилган бўлса, белгиланмаган жойларда ҳам шунча одам қурбон бўлган.
Ўзбекистон Марказий Осиёнинг энг қиммат терма жамоаси, Шомуродов энг қиммат футболчи бўлди
Германиянинг Transfermarkt сайти Марказий Осиё мамлакатлари футбол терма жамоалари рейтингида Ўзбекистон терма жамоаси 31,80 млн еврога баҳоланиб, минтақа рейтингида пешқадам бўлди. Элдор Шомуродов (12 млн евро) эса ушбу минтақанинг энг қиммат футболчиси дея қайд этилган. Рейтингда охирги ўринни Туркманистон жамоаси эгаллаган.
Шахматчи Нодирбек Абдусатторов Чемпионлар турида иштирок этади
Тезкор шахмат бўйича жаҳон чемпиони Нодирбек Абдусатторов Meltwater Чемпионлар турида илк ўйинини ўтказади. У биринчи бўлиб голландиялик гроссмейстер Аниш Гирига қарши ўйнайди, шунингдек, Магнус Карлсен, Динь Лижэн, Ян Непомнящий, Левон Аронян ва бошқа шахматчилар билан ҳам беллашади.
Юнон-рум курашчиси Султонбек Элмуратов допинг туфайли 4 йилга спортдан четлатилди
Юнон-рум курашчиси Султонбек Элмуратовдан 2021 йил октябрь ойида мусобақадан ташқари даврда олинган допинг синамасидан тақиқланган Фуросемид моддаси аниқланган. Спортчи 2025 йил 22 декабрга қадар спортдан четлатилди.
Ўзбекистонга яна 2,8 миллион доза Moderna вакцинаси келтирилди
Ўзбекистонга COVAX глобал дастури доирасида яна 2,8 миллиондан ортиқ Moderna вакцинаси келтирилди.
S7 Airlines авиакомпанияси Екатеринбургдан Фарғонага рейсларни йўлга қўймоқда
Россиянинг S7 Airlines авиакомпанияси Екатеринбург шаҳридан Фарғонага рейсларни йўлга қўймоқда. Таъкидланишича, парвозлар ҳафтада бир марта — чоршанбадан пайшанбага ўтар кечаси амалга оширилади. Парвоз вақти 3 соатни ташкил этиши айтилмоқда.
«Электромобиллар келажаги сари биринчи қадам». «Ўзавтосаноат» ва BYD меморандум имзолади
«Ўзавтосаноат» ва Хитойнинг йирик электромобиль ишлаб чиқарувчиси BYD Auto Industry ўртасида Ўзбекистонда электромобиль ва электробуслар ишлаб чиқариш бўйича ҳамкорлик меморандум имзоланди. UzAuto раҳбари ўринбосари Азизбек Шукуров буни «электромобиллар келажаги сари биринчи қадам» деб атади.
Энди ногиронлиги бўлган шахсларга бир хил миқдорда 622 минг сўм нафақа тайинланади
Президент фармонига мувофиқ, 1 апрелдан ногирон бўлиб қолган муддатидан қатъий назар имконияти чекланган шахсларга бир хил миқдорда — 622 минг сўмга тенг нафақа тайинланади. 18 ёшгача ногиронлиги бўлган болаларни парвариш қилувчи она-оталарга минимал истеъмол харажатлардан кам бўлмаган миқдорда (500 минг сўм) янги нафақа жорий этилмоқда.
Жаҳон банки Ўзбекистонга миллий статистика тизимини модернизация қилишга кўмаклашади
Жаҳон банки Ўзбекистоннинг миллий статистика тизимини модернизация қилиш бўйича беш йиллик лойиҳага 50 млн долларлик имтиёзли кредит ажратади. Ушбу маблағлар қисман 2023−2024 йилларда ўтказиладиган аҳолини ва уй-жой фондини ҳамда қишлоқ хўжалигини рўйхатга олиш ишларига ҳам йўналтирилади.
Мусулмонлар идораси имом-хатиблардан ихтилофли мавзуларни меҳробда туриб муҳокама қилмасликни сўради
Ўзбекистон мусулмонлари идораси адлия вазири ва Тошкент бош имом хатиби ўртасидаги одамларнинг «дўзахга тушиш-тушмаслиги борасидаги танлови» борасидаги баҳслар юзасидан муносабат билдирди. Идора Одоб-ахлоқ комиссияси чақирилгани, унда имом-хатибларга ихтилофли мавзуларни масжид меҳробида туриб муҳокама қилмаслик борасида тушунтириш берилганини маълум қилди.
Зарафшонда боғча тарбиячилари кўп қаватли уйлар подъездларини тозалашга жалб қилинди
Навоий вилоятининг Зарафшон шаҳрида боғча тарбиячилари кўп қаватли уйлар подъездларини тозалашга жалб этилди. Вилоят МТБ улар ўз ихтиёри билан тозалаш ишларида қатнашганини маълум қилди. Шаҳар маҳалла ва оилани қўллаб-қувватлаш бўлими эса бу ишларда нафақат боғча тарбиячилари, балки аҳоли, барча ташкилот ва корхоналар ходимлари ҳам қатнашгани, бундан кейин ҳам шундай бўлишини таъкидлади.
Фазлиддин Умаров Самарқанд шаҳрига ҳоким бўлди
Кадастр агентлиги директори Фазлиддин Умаров Самарқанд шаҳар ҳокими этиб тайинланди. У мазкур лавозимда Бобурмирзо Облакуловнинг ўрнини эгаллади.
Рустам Шоабдураҳмонов МОҚ раислигидан кетди
2019 йилнинг май ойидан бери Миллий олимпия қўмитаси раиси сифатида ишлаб келаётган Рустам Шоабдураҳмонов ўз аризасига биноан ишдан бўшатилди.
Асака туманида уч киши ис газидан вафот этди
Андижон вилояти Асака туманидаги фермер хўжалигининг уч ёлланма ишчиси ис газидан вафот этди. Улар қўлбола сандалга ёқилган кўмирдан чиққан ис газидан заҳарланишган. Туман прокуратураси терговга қадар текширув ўтказмоқда.
Бухоро вилоятидаги каналдан 33 ёшли аёлнинг жасади топилди
11 февраль куни Бухоро вилояти Қоракўл туманидаги маҳалладан оқиб ўтувчи каналдан аёл кишининг жасади топилди. Ҳолат юзасидан туман прокуратураси терговга қадар текшириш ишларини олиб бормоқда.
Нукус давлат педагогика институти қурилишида 12,7 млрд сўм ўзлаштирилгани аниқланди
ДХХ Нукус давлат педагогика институти қурилишида пудратчи «Jayhun Universal Qurilish» ва Қорақалпоғистон Вазирлар Кенгашининг «Ягона буюртмачи хизмати» мансабдорлари 12,7 млрд сўмни ўзлаштирганини маълум қилди. Бошқа бир ҳолатда эса пудратчи компаниялар кўп қаватли уй-жойлар қуриш учун бюджетдан ажратилган 17,5 млрд сўмни талон-торож қилганликда гумонланмоқда.
Хоразмда туман солиқ инспекцияси ходими пора олганликда гумон қилинмоқда
Хонқа тумани Давлат солиқ инспекцияси ходими 720 млн сўмлик солиқ тўловини камайтириб бериш эвазига тадбиркордан 5 минг доллар пора олганида қўлга тушгани айтилмоқда. Хоразмдаги бошқа бир ҳолатда эса икки нафар шахс тадбиркорга ноқонуний йўл билан 10 млрд сўм кредит олиб беришга уринганликда гумон қилинмоқда.
Жиззахда педагогика институти ходими $100 минг пора билан ушлангани айтилмоқда
Жиззах давлат педагогика институтининг таълим сифатини назорат қилиш бўлими бошлиғи факультетлардан бирида аниқланган камчиликлар деканга салбий таъсир қилмаслиги ва уни лавозимида қолишини таъминлаш эвазига 100 минг доллар олганида қўлга тушгани айтилмоқда. Унга нисбатан жиноят иши очилди.
Судьялар олий кенгаши яна бешта судьяни интизомий жазога тортди
Қашқадарё вилоятининг тўртта туман судьялари ҳамда Ангрен шаҳар суди раиси масъулиятсизлиги ва ишда йўл қўйган камчиликлари учун интизомий жазога тортилди.
