Apelsin рақамли банки Россиядан пул ўтказмаларини қабул қилишни ва юборишни вақтинча тўхтатди. Банк бу ҳақда ўз мижозларини мобил иловаси орқали огоҳлантирган.
«Apelsin орқали Россияга рубл валютасида пул юбориш ва қабул қилиш юқори волатиллик сабабига кўра вақтинча мавжуд эмас», — дейилади хабарда.
Шу билан бирга, VISA, Mastercard, Western Union пул ўтказмалари одатдаги тартибда ишлаётгани қўшимча қилинган.
25 февраль куни «Ҳамкорбанк» ҳам «банк тизимларида олиб борилаётган техник ишлар сабабли „Сбербанк Онлайн“ иловаси орқали пул маблағларини қабул қилиш вақтинчалик тўхтатилгани» ҳақида хабар берган эди. 28 февралдан техник ишлар тўлиқ бартараф этилгани сабабли юборилаётган пул ўтказмаларини қабул қилишни қайта тиклаганини эълон қилди.
Аввалроқ Европа ва АҚШ Россияга нисбатан янги санкциялар жорий қилган эди.
Санкциялар эълон қилинган банклар рўйхатидан «ВЭБ.РФ», «Сбер», «Газпромбанк», «Альфа-банк», «Открытие» банки, шунингдек, Ўзбекистоннинг «Ўзагроэкспортбанк» банкини сотиб олган йирик хусусий «Совкомбанк» ўрин олди.
«Россия банки» хабарига кўра, санкциялар остида қолган Россия банкларининг карталаридан Apple Pay ва Google Pay тўлов хизматлари орқали фойдаланиб бўлмайди. Шунингдек, Россиянинг санкция остидаги банклари SWIFT тизимидан узиб қўйилди.
