15 март куни Тошкент шаҳар ҳокимияти ташкил этилганига 15 кун бўлган фирмага Наврўз сайлида хизмат кўрсатиш учун 1 миллиард сўмлик ишларни тўғридан-тўғри топширди. Бу ҳақдаги маълумот Давлат харидлари порталига жойлаштирилган, бунга Davletovuz Telegram-канали эътибор қаратди.
Президентнинг 17 февралдаги [ПҚ-134-сон] қарорининг 2-иловасига кўра, «Янги Ўзбекистон» боғида Наврўз байрамига бағишланган халқ сайлини ўтказиш белгиланган ва унга асосий ташкилотчи этиб Тошкент шаҳар ҳокимлиги белгиланган. Тадбирлар ташкилотчиларнинг ўз маблағлари ҳисобига амалга оширилиши белгиланган.
28 февралда эса «дам олиш ва кўнгил очишни ташкил этиш»га мўлжалланган «Profi event» МЧЖ давлат рўйхатидан ўтказилган.
Ушбу компания билан Тошкент шаҳар ҳокимияти аппарати ўртасида 15 март куни тузилган шартномага кўра, 21−23 март кунлари компания «Янги Ўзбекистон» боғида бир қатор техник хизматларни кўрсатиши керак бўлган. Бу эса давлат харидлари порталида эълон қилинмаган.
Шунга қарамасдан, келишув асосида қилиниши лозим бўлган ишлар белгиланган:
- техник вазифага асосан қурилиш ишларини бажариш;
- декорацияларни тайёрлаш;
- боғда монтаж ва демонтаж хизматлари (боғнинг илк кўринишини тиклаш);
- дизайнер ва архитекторлар хизмати.
Шартнома фирма тузилганидан 15 ўтиб тузилган бўлсада, аслида ишлар аввалроқ бошланган бўлиши мумкин. Сабаби фирма 15 март — шартнома тузилган куни асосий конструкциялар қурилишини тугатиши керак бўлган. 19 мартда эса иккиламчи декорациялар тугатилиши кўзда тутилган.
Бундан ташқари, КТЯДР маълумотига кўра, «Profi Event» МЧЖ таъсичиси Абдуборийхўжа Абдувосиков айни вақтда «Autograph Event» ХКга ҳам эгалик қилади.
Ушбу компания ҳам «дам олиш ва кўнгил очишни ташкил этиш» хизматларини амалга оширади. Ушбу икки компаниянинг манзили ҳамда телефон рақамлари ҳам бир-бирига мос тушмоқда.
Autograph савдо белгиси аввал Тошкент шаҳар ҳокими Жаҳонгир Ортиқхўжаев таъсисчилигидаги «J-United Group»га тегишли эди. Айни вақтда унга «Maroon Trade» МЧЖ эгалик қилмоқда. Интелектуал мулк агентлигини «Газета.uz»га маълум қилишича, Autograph савдо белгиси 2022 йил 6 январь куни «J-United Group»дан «Maroon Trade»га ўтган.
Манба: Интелектуал мулк агентлиги.
«Autograph Event»нинг Facebook саҳифасида компания Akfa Medline, Dream City, Miniso, Crafers ва бошқакомпаниялар учун тадбирлар ўтказиб келганини кўриш мумкин.
«Газета.uz» Тошкент шаҳар ҳокимияти матбуот хизматига сўров юборди.
Абдуборийхўжа Абдувосиқов таҳририятнинг битимни изоҳлаш сўровига жавоб бермади.
