Венгрия пойтахти Будапештда дзюдо бўйича «Катта дубулға» туркумидаги мусобақада қатнашган етти нафар ўзбекистонлик дзюдочилар кумуш ва бронза медалига эга чиқди. Бу ҳақда Миллий олимпия қўмитаси матбуот хизмати хабар берди.
+100 кг вазн тоифасида курашган Шоҳруҳ Бахтиёров бронза медали учун беллашувда финляндиялик Марти Пумалайненга қарши татамига чиқиб, бронза медалига эга чиқди. У ўз ҳисобига жаҳон рейтинги учун 500 очко, Париж-2024 олимпия ўйинлари учун 250 рейтинг очкосини ёзиб қўйди.
1-ўрин — Райнер Тедди (Франция)
2-ўрин — Снип Желле (Нидерландия)
3-ўрин — Магомедомар Магомедомаров (БАА)
3-ўрин — Бахтиёров Шохруҳ (Ўзбекистон)
Шохруҳ Бахтиёров. Фото: Grand Slam Hungary 2022/ International Judo Federation
-66 кг вазн тоифаси финалида иштирок этган Раҳимжон Субхонов ҳал қилувчи беллашувда япониялик Олимпиада чемпиони Хифуми Абега қарши курашди. Якунда Абе 2 вазари баҳоси билан ўзининг 3 йилдан бери узилмаётган мағлубиятсиз сериясини давом эттирди. Субхонов эса кумуш медаль билан тақдирланди.
Раҳимжон Субхонов фаолиятида илк бор «Катта дубулға» турнирларида медалга эга чиқди. Бундан ташқари у жаҳон рейтинги учун 700, Париж-2024 Олимпиадаси йўлида 350 очкони ўз ҳисобига қўшиб қўйди.
1-ўрин — Хифуми Абе (Япония)
2-ўрин — Раҳимжон Субхонов (Ўзбекистон)
3-ўрин — Фликер Тал (Исроил)
3-ўрин — Ганболд Кҳерлен (Монголия)
Раҳимжон Субхонов — 2 ўринда. Фото: Grand Slam Hungary 2022/ International Judo Federation
