Президент томонидан 7 сентябр куни [ПФ-215-сон] «Ўзбекистон Республикасининг тўғридан-тўғри инвестициялар жамғармаси фаолиятини такомиллаштириш чора-тадбирлари тўғрисида»ги фармон қабул қилинди. Бу ҳақда Адлия вазирлиги хабар берди.
Унга мувофиқ «Тўғридан-тўғри инвестициялар жамғармасининг бошқарув компанияси» акциядорлик жамияти устав капитали 100 миллион АҚШ долларига тенг «Ўзбекистон Республикасининг Тўғридан-тўғри инвестициялар жамғармаси» МЧЖ шаклидаги инвестиция компанияси сифатида қайта ташкил қилинди.
Инвестиция компаниясининг устав капитали 1 миллиард АҚШ долларига етказилади. Белгиланишича, инвестициялар ва ташқи савдо вазири инвестиция компаниясининг Кузатув кенгаши раиси ҳисобланади.
Фармон билан компаниянинг инвестицияларни жалб қилиш усуллари белгилаб берилди. Жумладан:
- кредит (қарз) олиш ва Инвестиция компаниясининг устав капиталига инвесторларнинг пул маблағларини жалб қилиш;
- юридик шахсларни ташкил этиш ёки уларнинг устав фондларида (устав капиталида), шу жумладан мол-мулк сотиб олиш йўли билан иштирок этиш орқали.
Шунингдек, компания йирик институционал ва стратегик инвесторлар билан ҳамкорлик ўрнатиш, шу жумладан нуфузли халқаро молия марказларининг юрисдикцияларидан фойдаланиш вазифасини бажаради.
Маълумот учун, Тўғридан-тўғри инвестициялар жамғармаси Вазирлар Маҳкамасининг 2019 йил майдаги қарорига мувофиқ ташкил этилган эди.
Жамғарманинг асосий вазифаларига ишлаб чиқариш салоҳиятини кенгайтириш, рақобатбардошлигини янада оширишга тўғридан-тўғри хорижий инвестициялар ва инновацион технологияларни жалб қилиш, хусусий маҳаллий ва хорижий инвесторлар билан узоқ муддатли ўзаро фойдали шериклик муносабатларини йўлга қўйиш орқали инвестиция фаолиятини рағбатлантириш ва ривожлантириш, шунингдек, инвестиция таклифларини баҳолаш, инвестиция лойиҳаларини ишлаб чиқиш ва амалга ошириш кабилар кирган.
