17 октябрь куни соат 11:10 ларда Фарғона вилоятида жойлашган Indorama Kokand Fertilizers and Chemicals корхонасида бахтсиз ҳодиса юз берган. Бу ҳақда «Ўзкимёсаноат» матбуот хизмати хабар берди.
Маълум бўлишича, Indorama Kokand Fertilizers and Chemicals заводида қадоқлаш цехидаги қурилиш монтаж ишлари жумладан, ўғит қадоқлаш ускунаси бункери остида металл конструкция қисмларини ўрнатиш жараёнида, бункер Metall Universal 777 ишчиси устига қулаб тушган. Оқибатда эркак вафот этган.
Ҳозирда дастлабки экспертиза ва терговга қадар текширув ҳаракатлари олиб борилмоқда.
Маълумот учун, Indorama Kokand Fertilizers and Chemicals корхонаси 2019 йилда Сингапурнинг Indorama Holdings компанияси томонидан Қўқон суперфосфат заводини хусусийлаштирилиши натижасида ташкил этилган.
