25 июль куни Хитой парламенти етти ойдан бери ташқи ишлар вазири лавозимида ишлаб келаётган Цинь Ганни лавозимидан озод қилди, деб хабар бермоқда Global Times нашри.
Ганнинг ўрнига КПК Марказий Қўмитасининг Ташқи ишлар комиссияси девони раҳбари Ван И тайинланди.
Цинь Ганнинг истеъфоси унинг узоқ вақт давомида жамоатчиликка кўриниш бермагани фонида содир бўлди. Газетанинг ёзишича, Ганни охирги марта 25 июнь куни Пекинда Россия, Вьетнам ва Шри-Ланка ташқи ишлар вазирлари билан учрашувда кўрилган.
Вазир июль ўрталарида Индонезиядаги АСEАН саммитига ҳам бормаган, унинг ўрнига Ван И иштирок этган эди. ТИВ буни Ганнинг соғлиғи билан боғлиқ муаммолар билан изоҳлаганди.
Аввалроқ, Цинь Ган йўқлиги сабабли Пекинга сафари Буюк Британия ташқи ишлар вазири Жеймс Клеверли томонидан бекор қилинган, июль ойи бошида эса Хитой Европа Иттифоқи ташқи хизмати раҳбари Жозеп Боррелнинг ташрифини ортга сурган эди.
