10 август куни соат 16:20 атрофида Тошкент шаҳрининг Учтепа туманида автомашина ва автобус иштирокида йўл транспорт ҳодисаси содир бўлди, дея хабар бермоқда Йўл ҳаракат хавфсизлиги хизмати.
Туманнинг ТХАЙ — Пойгоҳ кўчалари кесишмасида 1963 йилда туғилган А.Т. бошқарувида бўлган Yutong русумли автобуси 1989 йилда туғилган Р.Б. бошқарувидаги Spark автомашинаси билан ЙТҲ содир этган.
«7-Автобус саройи» филиали тасарруфидаги 13-сонли автобус қўшимча йўл (кармашка)дан белгиланган йўналиши бўйлаб меъёрий тезликда ҳаракатланаётганда йўлга чиқиб қолган Spark автобуснинг ўнг томони билан тўқнашиб кетган. ЙТҲ оқибатида тан жароҳат олганлар бўлмаган.
Фото: Uznews.uz
Охирги пайтларда, хусусан, июль ойида пойтахтда янги автобуслар иштирокида қатор ЙТҲлар содир бўлди. Хусусан, 27 июль куни Истироҳат кўчаси бўйлаб ҳаракатланаётган 147-йўналишдаги Yutong автобусига «ЗИЛ» ҳайдовчиси уни ўнг томондан қувиб ўтмоқчи бўлганида шикаст етган.
24 июль куни енгил автомобиль ҳайдовчиси қоидаларни бузиб, ЙТҲ ҳолатини юзага келтирган ва 28-йўналишдаги электробус ҳайдовчиси кескин тормоз босишга мажбур бўлган. Оқибатда автобус йўловчиларидан бири йиқилиб, шифохонага олиб кетилган.
19 июль куни Яккасарой туманида 77-сонли автобус ҳайдовчиси йўлнинг белгиланмаган қисмидан кесиб ўтаётган пиёдани уриб юборган. Фуқаро олган тан жароҳатлари сабабли шифохонада вафот этган.
10 июль куни 147-йўналишда ҳаракатланаётган Mercedes-Benz русумли автобуснинг мотор қисмида ёнғин содир бўлган, ҳеч ким жабрланмаган.
Шунингдек, 2 август куни кечқурун Мирзо Улуғбек туманида Yutong русумли йўловчи автобуси ва Malibu русумли енгил автомобиль тўқнашган.
