Қонунчилик палатасидаги навбатдаги мажлисда депутатлар «2024 йил учун Ўзбекистон Республикасининг Давлат бюджети тўғрисида»ги қонун лойиҳасини иккинчи ўқишда кўриб чиқишди.
Аввалги мажлисда «Адолат» партиясидан сайланган депутат Олтиной Маъмирова ушбу турдаги ичимликлар учун алоҳида акциз солиғини жорий этиш ва ставкани литри учун 5 минг сўм қилиб белгилашни таклиф қилганди. Бош вазир ўринбосари, иқтисодиёт ва молия вазири Жамшид Қўчқоров бу таклифни қўллаб-қувватлаб, ушбу бандни 2024 йилги давлат бюджети тўғрисидаги қонун лойиҳасини кейинги ўқишларда кўриб чиқиш чоғида киритишни сўраганди.
Бугунги мажлисда депутатлар томонидан жорий этилиши назарда тутилаётган акциз солиғини маҳсулот нархига ва тадбиркорлик субъектлари фаолиятининг молиявий натижаларига таъсирини инобатга олган ҳолда энергетик ичимликларнинг 1 литри учун 2000 сўм миқдорида акциз солиғи белгилаш таклиф этилди.
Мажлис якунида қонун лойиҳаси депутатлар томонидан қабул қилинди.
Маълумот учун, меъёридан ортиқча истеъмол қилиниши оқибатида турли хасталиклар, жумладан, қандли диабет касаллигига чалиниш ҳолатлари кўпайгани сабабли таркибида шакар бўлган газланган ичимликларга 1 апрелдан 1 литр учун 500 сўм миқдорида акциз солиғини жорий этиш режалаштирилганди.
Эслатиб ўтамиз, 2018 йил охирида Ўзбекистонда 18 ёшга тўлмаган шахсларга энергетик ичимликлар сотишни тақиқловчи ва уларнинг рекламасига чекловлар жорий қилувчи қонун қабул қилинган эди.
