Истиқболли лойиҳалар миллий агентлиги суғурта ташкилотларидан бири — Universal sug‘urta акциядорлик жамиятининг лицензияси 2 апрелдан бекор қилингани ҳақида хабар берди.
Агентлик «Лицензиялаш, рухсат бериш ва хабардор қилиш тартиб-таомиллари тўғрисида»ги қонуннинг 33-моддаси ва «Махсус электрон тизим орқали айрим фаолият турларини лицензиялаш тартиби тўғрисидаги ягона низом»нинг 49-бандига мувофиқ қарор қабул қилган.
Унга кўра, Universal sug‘urta АЖнинг умумий суғурта соҳасининг 1, 2, 3, 4, 5, 6, 7, 8, 9, 10, 11, 12, 13, 14, 15, 16 ва 17 класслари бўйича ихтиёрий суғурта фаолиятини амалга ошириш бўйича берилган 2022 йил 7 июлдаги 031932-сонли лицензияси 2 апрелда бекор қилинди.
Агентлик суғурта ташкилоти илгари тузилган суғурта (қайта суғурта) шартномалари бўйича ўз зиммасига олган мажбуриятларини белгиланган тартибда бажариши шарт эканини таъкидлади.
Аввалроқ «Капитал суғурта» АЖнинг молиявий ҳисоботларини ўрганиш натижаларига кўра қонунчилик ҳужжатларида белгиланган меъёрларга риоя қилинмаганлик фактлари аниқланиб, оқибатда 162 млн сўм миқдорида жарима солинганди. Бундан ташқари, суғурта ташкилотининг суғурта фаолиятини амалга ошириш бўйича берилган лицензия 2024 йил 11 январь санасидан бошлаб 10 кун муддатга тўхтатиб қўйилган.
