Европа тикланиш ва тараққиёт банки (ЕТТБ) президенти Одиль Рено-Бассо 2024 йилнинг 2−3 май кунлари Ўзбекистонга ташриф буюриб, юқори мартабали ҳукумат вакиллари ва хорижий инвесторлар билан учрашади.
ЕТТБ президенти икки кунлик дастури доирасида Шавкат Мирзиёев билан учрашади, шунингдек, бош вазир ўринбосари Жамшид Ходжаев ва бош вазир ўринбосари, иқтисодиёт ва молия вазири Жамшид Қўчқоров билан икки томонлама учрашувлар ўтказади.
У, шунингдек, Хорижий инвесторлар кенгашининг 2-ялпи мажлисига ҳамраислик қилади, Тошкент халқаро инвестиция форумида нутқ сўзлайди.
Ушбу келишувлар доирасида Рено-Бассо Ўзбекистоннинг иқлим ўзгаришларига сув ва иссиқлик таъсирининг кучайиши нуқтаи назаридан янада чидамлилиги муҳимлиги, ислоҳотлар орқали мамлакатда ишбилармонлик муҳитини янада яхшилаш зарурати, минтақалараро боғлиқлик, энергия хавфсизлиги ва мамлакат иқтисодиётини диверсификация қилиш масалаларига тўхталиб ўтади, дейилади хабарда.
Унинг ташрифи давомида банк барқарор транспорт алоқаларини ривожлантириш ва ёшлар тадбиркорлигини қўллаб-қувватлашга қаратилган бир қанча лойиҳаларни имзолашни режалаштирмоқда.
Маълумот учун, Ўзбекистон кетма-кет тўртинчи йил Марказий Осиёда ЕТТБ маблағларини олувчи етакчи давлат ҳисобланади. Бугунги кунга қадар банк бутун мамлакат бўйлаб 151 та лойиҳага 4,42 млрд еврога яқин сармоя киритди, бу маблағларнинг катта қисми хусусий тадбиркорликни қўллаб-қувватлашга қаратилган.
