Остона суди судьялар ҳукми асосида Қозоғистон собиқ миллий иқтисодиёт вазири Куандик Бишимбаевга рафиқаси Салтанат Нукенованинг ўлдирилишига доир иш бўйича ҳукм чиқарди, деб ёзмоқда Tengrinews.kz.
44 ёшли Бишимбаев ўз хотинини ўта шафқатсизларча қийноққа солиб ўлдирганликда айбдор деб топилиб, 24 йилга қаттиқ тартибли колонияга озодликдан маҳрум этилди.
Бишимбаевнинг амакиваччаси Бахитжан Байжанов ҳам қамоқ жазосига ҳукм қилинди — у жиноятни яширганликда айбланиб, тўрт йилга озодликдан маҳрум этилди.
Ҳукм эълон қилинишидан кадрлар. Қозоғистон Олий суди.
Тергов маълумотларига кўра, 2023 йилнинг 8 ноябридан 9 ноябрига ўтар кечаси Бишимбаев Остонадаги Bau ресторанида жанжал оқибатида 31 ёшли Нукеновани уриб ўлдирган. Прокурор хулосасига кўра, Нукенова бош мия жароҳати туфайли вафот этган. Унинг юзи ва танасида бир нечта кўкаришлар бўлган, бурни синган. Экспертиза натижалари шуни кўрсатганки, калтаклар тахминан саккиз соат давом этган. Бишимбаев воқеани ўз телефонида тасвирга олган; бу ёзувлар кейинроқ судда намойиш этилди.
Суд жараёнида маълум бўлишича, ўлдирилган Нукенованинг жасади рестораннинг VIP кабинасида бир неча соат ётган. Бу вақтда собиқ вазир фолбинга қўнғироқ қилиб, рафиқаси билан ҳаммаси жойида ёки йўқлигини билиб, иш учрашувлари ўтказган ва бошқа аёл билан ёзишган.
Айблов, шунингдек, Бишимбаев Нукеновани мунтазам калтаклаб келгани, унга ишлашни тақиқлагани ва мулоқот доирасини чеклаганини кўрсатди.
Бишимбаев қотилликдан сўнг дарҳол қўлга олинган. Суд мажлислари 2024 йил 11 мартда бошланган. Судда собиқ вазир рафиқасининг ўлимига сабаб бўлган жароҳатларни ўзи содир этганини тан олган, лекин қасддан қилинган қотиллик айбини тан олмаган.
- Куандик Бишимбаев 2016 йилнинг майидан декабригача Қозоғистон иқтисодиёт вазири бўлган. 2017 йил январь ойида у жуда катта миқдорда пора олганликда айбланиб ҳибсга олинган. 2018 йил мартида суд Бишимбаевни 10 йилга озодликдан маҳрум қилган, бироқ 2019 йил октябрь ойида собиқ вазир амнистия акти билан озод этилган.
- Бишимбаев иши Қозоғистонда ҳам, хорижда ҳам кенг резонансга сабаб бўлди. Бу каби жараён мамлакат тарихида биринчи марта онлайн трансляция қилинди. Апрель ойида Қозоғистон президенти Қосим-Жомарт Тоқаев оиладаги зўравонликни жиноий жавобгарликка тортувчи қонунни имзолаган эди. Одамлар тилида у «Салтанат қонуни» деб аталади.
