Марказий банк 2024 йилнинг биринчи чораги учун валюта бозоридаги савдолар бўйича чекланган маълумотларни тақдим этди.
Ёзганимиздек, илгари ҳар ойда чоп этиладиган статистик бюллетенда валюта айирбошлаш ҳажми тўғрисидаги жадвалда тижорат банклари томонидан валюта олди-сотдиси бўйича маълумотлар алоҳида эълон қилинар эди.
2023 йилга мўлжалланган янги бюллетенда мазкур бўлим умумлаштирилган ва «Тижорат банкларининг валюта савдоси айланмаси» деб ўзгартирилган.
Январь-март ойларида савдо ҳажми 5,82 миллиард долларни ташкил этган, бу 2023 йилнинг биринчи чорагидагига нисбатан 2,7 фоизга кам (5,98 миллиард доллар) ҳисобланади. Бунгача кўрсаткичда ўсиш кузатилган — 2021 (2,97 миллиард доллар) ва 2022 йилларнинг биринчи чораги (3,78 миллиард доллар).
Бундан ташқари, агар 2020−2023 йилларда йилнинг дастлабки уч ойида кўп йўналишли динамика кузатилган бўлса, 2024 йилда бу кўрсаткич аста-секин пасайиб бормоқда: январда — 1,98 миллиард доллар (ўтган йилнинг январига нисбатан -3,2 фоиз), февралда — 1,96 миллиард доллар (+2,3 фоиз), мартда — 1,88 миллиард доллар (-6,8 фоиз).
Молиячи Отабек Бакировнинг фикрича, валюта савдосининг пасайишига давлат компаниялари учун валюта операцияларини амалга ошириш тартиби устидан назорат, импорт жараёнининг мураккаблашиши ва биржадан ташқари валюта операцияларининг ўсиши сабаб бўлиши мумкин.
«Газета.uz»нинг банк тизимидаги манбаси валюта савдолари ҳажмининг пасайишига ушбу уч омил таъсир кўрсатиши мумкинлигини тасдиқлади. Суҳбатдошнинг қўшимча қилишича, корхоналар ва жисмоний шахслардан чет эл валютасини етказиб бериш (валюта сотиш) ўтган йилнинг мос даврига нисбатан ошган.
