Нью-Йорк ҳакамлар ҳайъати АҚШ собиқ президенти Дональд Трампни 2016 йилги сайловлар олдидан порноактриса Сторми Дэниелсга ўтказилган тўловни яшириш мақсадида бизнес ҳисоботларини сохталаштиришда айбдор деб топди, дея хабар берди Reuters. Трамп АҚШ тарихида жиноий ишда айбдор деб топилган биринчи президентга айланди.
Икки кун давом этган муҳокамалардан сўнг 12 кишидан иборат ҳакамлар ҳайъати Трампни кўриб чиқилган барча 34 та банд бўйича айбдор деб топди.
Трамп қимир этмай ўтирди ва ҳукмни тинглади, дея қайд этди агентлик. 77 ёшли сиёсатчи айбдор эканини рад этди ва қарор устидан шикоят қилиши кутилмоқда. «Бу шармандалик эди», деди у айбдор деб топилганидан кейин.
Трампга жазо чорасини судья Хуан Мерчан белгилайди. Ҳукм 11 июль куни, Республикачилар партияси 5 ноябрда бўлиб ўтадиган сайловлар олдидан Трампни президентликка расман номзод қилиб кўрсатишни режалаштираётганидан бир неча кун олдин эълон қилинади.
Айбловга кўра, 2016 йилги президентлик сайловлари олдидан Трамп адвокати орқали Дэниэлсга у билан бўлган муносабати ҳақида сукут сақлаши учун 130 минг доллар тўлаган. Тўловнинг ўзи қонунбузарликка кирмасди, бироқ Трамп ва унинг адвокати Майкл Коэн буни юридик хизматлар учун тўлов сифатида кўрсатган, ўз навбатида, Нью-Йорк штатида бу ҳисоботларни сохталаштириш деб баҳоланмоқда ва жиноий жавобгарликка сабаб бўлади. Коэн ва Дэниэлс суд жараёнида айбловчи томон сифатида гувоҳлик берди.
Reuters агентлигининг таъкидлашича, бизнес ҳисоботларини қалбакилаштириш учун максимал жазо тўрт йиллик қамоқ ҳисобланади. Айбдор деб топилганлар кўпинча қисқароқ муддатга қамалади ёки жарима тўлайди, шунингдек, синов муддатини олади. Қамоқ жазоси қонун бўйича Трампнинг сайловолди ташвиқотини юритиши ёки ғалаба қозонган тақдирда лавозимга киришишига тўсқинлик қилмайди.
Сторми Дэниелсга тўлов иши яна бир бор президентликка қайтишга уринаётган Трампга қарши очилган тўртта жиноий ишдан бири ҳисобланади. Унга қарши, шунингдек, Жоржиядаги 2020 йилги сайлов натижаларини бекор қилишга уриниш, 2021 йил январида Капитолийга ҳужум қилиш ва махфий ҳужжатлар билан ноқонуний муомала қилиш билан боғлиқ айбловлар илгари сурилмоқда. Трамп уларнинг ҳар бири бўйича айбдор эканини рад этмоқда.
Нью-Йорк иши Трампга қарши очилган тўртта жиноий ишнинг энг кам аҳамиятли бўлгани ҳисобланади. Аммо мазкур ҳукм сайлов олдидан чиқарилган ягона ҳукм бўлиши мумкинлиги туфайли муҳим бўлиб турибди. Қолган жараёнлар муаммолар туфайли кечиктирилади.
