2026 йил 1 июлдан UzGasTrade акциядорлик жамиятининг табиий газни ягона экспорт қилувчи ва импорт орқали ташқи манбалардан марказлашган тартибда харид қилиш бўйича ягона оператор сифатидаги эксклюзив ҳуқуқи бекор қилинади. Бу президентнинг 4 июнь куни ЎзАда эълон қилинган фармонида назарда тутилган.
2026 йил 1 июлдан, шунингдек, «Ўзэнергосотиш» акциядорик жамиятининг ҳам электр энергиясининг экспорти ва импортини марказлашган тартибда амалга ошириш бўйича ҳуқуқи бекор қилиниши белгиланган.
Фармон «Ўзбекистон — 2030» стратегиясида кўзда тутилган вазифаларни амалга ошириш, жумладан, миллий иқтисодиётнинг глобал ишлаб чиқариш ва қўшилган қиймат занжирига интеграциясини чуқурлаштириш, эркин бозор тамойилларини амалда татбиқ этишни кенгайтириш ҳамда Ўзбекистоннинг Жаҳон савдо ташкилотига аъзолигига эришишни жадаллаштириш мақсадида имзоланган.
Ҳужжат билан, шунингдек, 2025 йил 1 январдан қуйидаги компанияларнинг махсус ҳуқуқлари ҳам бекор қилиниши белгиланди:
- «Ўзметкомбинат» АЖнинг республика ҳудудида қора металл ломи ва чиқиндиларини тайёрлаш (харид қилиш) ҳуқуқи;
- «Ўзиккиламчиранглиметалл» АЖнинг республика ҳудудида рангли металл ломи ва чиқиндиларини тайёрлаш ва экспорт қилиш ҳуқуқи;
- «Ўзтрейд» АЖнинг консигнация шартларида озиқ-овқат уни ва буғдойни, шунингдек, кичик бизнес ва хусусий тадбиркорлик субъектлари, деҳқон ва фермер хўжаликлари маҳсулотларини банк кафолатлари ёки сиёсий ва тижорат хавфларидан экспорт шартномаларини суғурталаш полисларини тақдим этмасдан экспорт қилинадиган маҳсулотларни савдо уйлари манзилларига тушириш ҳуқуқи;
- «Ўзкимёимпекс» МЧЖнинг «Ўзкимёсаноат» АЖ ташкилотлари кимёвий маҳсулотлари экспорти ҳамда уларнинг ишлаб чиқариш эҳтиёжлари учун ускуналар, эҳтиёт қисмлар, бутловчи буюмлар, хомашё ва материаллар импортини амалга оширишдаги ягона агент ҳуқуқи.
Шунингдек, 2025 йилдан табиий газ ва электр энергиясининг улгуржи ва чакана савдо фаолиятларини лицензиялаш тартиби жорий этилади.
